આણંદ-વિદ્યાનગર વિસ્તારમાં માર્ચ મહિનાની શરૂઆતથી જ ઉનાળાની તીવ્રતા જોવા મળી રહી છે. તાજેતરમાં અહીં તાપમાન 39 ડિગ્રી સેલ્સિયસને પાર પહોંચતાં લોકોને માર્ચ મહિનામાં જ કડકડતી ગરમીનો અનુભવ થવા લાગ્યો છે.
સામાન્ય રીતે એપ્રિલ-મે મહિનામાં અનુભવાતી ગરમી આ વર્ષે માર્ચમાં જ શરૂ થતા લોકોમાં ચિંતા જોવા મળી રહી છે.
બપોરના સમયે રસ્તાઓ પર લોકોની અવરજવર ઘટી રહી છે, જ્યારે ગરમીથી બચવા માટે લોકો ઠંડા પીણાં, છાશ અને પાણીનો સહારો લઈ રહ્યા છે. ગરમી વધતા વેપારીઓએ પણ ઠંડા પીણાં, ગોળા અને જ્યૂસના સ્ટોલ વધાર્યા છે. બીજી તરફ ખેડૂતો અને મજૂરોને ખુલ્લામાં કામ કરતી વખતે ભારે મુશ્કેલીનો સામનો કરવો પડી રહ્યો છે.
હવામાન વિભાગના અનુમાન મુજબ આગામી દિવસોમાં તાપમાનમાં વધુ વધારો થવાની શક્યતા છે. જો માર્ચ મહિનામાં જ તાપમાન 39 ડિગ્રી સુધી પહોંચી ગયું છે, તો એપ્રિલ અને મે મહિનામાં ગરમી વધુ તીવ્ર બની શકે છે. નિષ્ણાતોના જણાવ્યા અનુસાર આ વર્ષે ઉનાળો વધુ કઠોર રહેવાની સંભાવના વ્યક્ત કરવામાં આવી રહી છે.
ગરમીથી બચવા માટે તબીબો દ્વારા લોકોને પૂરતું પાણી પીવું, સીધી ધૂપમાં જવાનું ટાળવું અને જરૂરી હોય ત્યારે જ બહાર નીકળવાની સલાહ આપવામાં આવી રહી છે.
