દેશમાં ચોમાસાની ગતિવિધિઓ તેજ બનતાં હવે અનેક રાજ્યોમાં વરસાદી માહોલ જામવાનો છે. હવામાન વિભાગ (IMD) મુજબ આગામી થોડા દિવસોમાં ઉત્તર અને દક્ષિણ ભારતમાં ભારે વરસાદની શક્યતા છે, જ્યારે ગુજરાત સહિત પશ્ચિમ ભારતમાં પણ ગરમીમાંથી આંશિક રાહત મળવાની આશા છે.
ઉત્તર ભારતમાં ક્યારે પડશે વરસાદ?
જમ્મુ-કાશ્મીર, હિમાચલ પ્રદેશ અને ઉત્તરાખંડમાં 26 મેથી 29 મે દરમિયાન ભારે વરસાદ, ગાજવીજ અને તેજ પવનની શક્યતા છે. કેટલાક પહાડી વિસ્તારોમાં કરા પણ પડી શકે છે. હવામાન વિભાગે આ રાજ્યોમાં યલો એલર્ટ જાહેર કર્યું છે.
કેરળમાં ચોમાસાની એન્ટ્રી
કેરળમાં 26 મે આસપાસ ચોમાસું સત્તાવાર રીતે પ્રવેશી શકે છે. 28 મે થી 3 જૂન દરમિયાન કેરળ, લક્ષદ્વીપ અને કર્ણાટકના દરિયાકાંઠાના વિસ્તારોમાં ભારે થી અતિભારે વરસાદની આગાહી કરવામાં આવી છે.
ગુજરાતમાં ક્યારે બદલાશે હવામાન?
ગુજરાતમાં હાલ ગરમી અને ઉકળાટ યથાવત છે, પરંતુ 29 મે પછી દક્ષિણ ગુજરાત અને સૌરાષ્ટ્રના કેટલાક વિસ્તારોમાં પ્રી-મોન્સૂન એક્ટિવિટી શરૂ થઈ શકે છે. અમદાવાદ, વડોદરા, સુરત અને રાજકોટ સહિત કેટલાક વિસ્તારોમાં વાદળછાયું વાતાવરણ, છૂટાછવાયા ઝાપટા અને પવન ફૂંકાવાની શક્યતા છે.
ચોમાસું ગુજરાતમાં ક્યારે પહોંચશે?
હાલની ગતિ પ્રમાણે ચોમાસું ગુજરાતમાં 10 થી 15 જૂન વચ્ચે દસ્તક આપી શકે છે. જો અરબી સમુદ્રમાં સિસ્ટમ વધુ મજબૂત બનશે તો ચોમાસું સમય પહેલાં પણ આગળ વધી શકે છે.
હવામાન વિભાગે લોકોને ભારે વરસાદ અને વાવાઝોડા દરમિયાન સાવચેતી રાખવાની અપીલ કરી છે.
