વડોદરા જિલ્લાના કરજણ નજીક નેશનલ હાઈવે-48 પર આવેલા પેટ્રોલ-સીએનજી પંપ પર ચોંકાવનારી ઘટના બની છે. જિંદાલ કંપની સામે આવેલા પંપ પર CNG રિફિલિંગ દરમિયાન એક કારની ગેસ ટેન્ક અચાનક પ્રચંડ ધડાકા સાથે ફાટી ગઈ હતી. બ્લાસ્ટ થતાં પંપ પર હાજર લોકો અને કર્મચારીઓમાં અફરાતફરી મચી ગઈ હતી.
ઘટનાનો CCTV વીડિયો પણ સામે આવ્યો છે, જેમાં CNG ભરાવતી વખતે અચાનક થયેલા વિસ્ફોટની સમગ્ર ઘટના કેદ થઈ હોવાનું સામે આવ્યું છે.
CNG ભરાતી હતી અને અચાનક થયો ધડાકો
મળતી માહિતી પ્રમાણે, એક કારચાલક પોતાની CNG કારમાં ગેસ ભરાવવા માટે પંપ પર આવ્યો હતો. કર્મચારી દ્વારા કારમાં CNG રિફિલિંગ કરવામાં આવી રહ્યું હતું. આ દરમિયાન કારની નજીક કેટલાક લોકો પણ હાજર હતા.
CNG ભરવાની પ્રક્રિયા ચાલી રહી હતી ત્યારે અચાનક જ કારની ગેસ ટેન્કમાં જોરદાર વિસ્ફોટ થયો હતો. ધડાકાનો અવાજ એટલો પ્રચંડ હતો કે પંપ પર હાજર લોકોમાં ભયનો માહોલ સર્જાયો હતો અને લોકો સુરક્ષિત જગ્યાએ જવા માટે દોડી ગયા હતા.
કારના પતરાં અને કાચ દૂર સુધી ફંગોળાયા
વિસ્ફોટની તીવ્રતાને કારણે કારના પાછળના ભાગને ભારે નુકસાન થયું હતું. કારના પતરાં અને કાચના ટુકડા દૂર સુધી ફંગોળાયા હતા.
આ બ્લાસ્ટની અસર આસપાસ પાર્ક કરાયેલા અન્ય વાહનો પર પણ થઈ હતી. નજીક ઊભેલી બે અન્ય ગાડીઓને પણ નુકસાન પહોંચ્યું હોવાનું સામે આવ્યું છે.
મોટી દુર્ઘટના ટળી, જાનહાનિ ન થતાં રાહત
ઘટનામાં સૌથી મોટી રાહતની વાત એ છે કે કોઈ જાનહાનિ થઈ નથી. CNG ભરાવતી વખતે કારમાં કોઈ વ્યક્તિ હાજર ન હતી. મુસાફરો કારની બહાર હોવાથી મોટી દુર્ઘટના ટળી હોવાનું જાણવા મળી રહ્યું છે.
જોકે, બ્લાસ્ટ કેટલો શક્તિશાળી હતો તેનો અંદાજ કારને થયેલા નુકસાન પરથી લગાવી શકાય છે.
ફાયર ટીમ અને પોલીસ ઘટનાસ્થળે પહોંચી
બ્લાસ્ટની જાણ થતાં જ કરજણ ફાયર ફાઈટરની ટીમ તાત્કાલિક ઘટનાસ્થળે પહોંચી હતી. ટીમે પરિસ્થિતિનું નિરીક્ષણ કરી વધુ કોઈ આગ, સ્પાર્ક અથવા અન્ય જોખમ ઊભું ન થાય તે માટે જરૂરી સાવચેતીના પગલાં લીધા હતા.
બીજી તરફ પોલીસ પણ સ્થળ પર પહોંચી હતી અને પંપ પરિસરની સુરક્ષા વ્યવસ્થાની તપાસ હાથ ધરી હતી.
ટેન્ક કેમ ફાટી? કારણ જાણવા તપાસ
પ્રાથમિક રીતે CNG ટેન્કમાં ટેકનિકલ ખામી અથવા અતિશય પ્રેશરને કારણે વિસ્ફોટ થયો હોવાની શક્યતા વ્યક્ત કરવામાં આવી રહી છે. જોકે, બ્લાસ્ટનું ચોક્કસ કારણ સત્તાવાર તપાસ બાદ જ સ્પષ્ટ થશે.
હાલ પોલીસ અને સંબંધિત તંત્ર દ્વારા ઘટનાની તપાસ કરવામાં આવી રહી છે. સાથે જ CNG ટેન્ક અને રિફિલિંગ સિસ્ટમની પણ તપાસ કરવામાં આવી રહી છે કે બ્લાસ્ટ પાછળ ચોક્કસ કારણ શું હતું.