ઉત્તરાખંડમાં કેદારનાથ યાત્રા દરમિયાન સતત વરસાદને કારણે યાત્રાળુઓની મુશ્કેલી વધી છે. સુરતના અલથાણ વિસ્તારથી બાબા કેદારનાથના દર્શન માટે ગયેલા 14 લોકોના ગ્રૂપમાંથી 11 શ્રદ્ધાળુઓ હજુ પણ ત્યાં ફસાયેલા હોવાની માહિતી સામે આવી છે. આ દરમિયાન ત્રણ લોકોને સ્થાનિક તંત્ર દ્વારા હેલિકોપ્ટરની મદદથી સલામત સ્થળે ખસેડવામાં આવ્યા હોવાનું જણાવાયું છે.
વરસાદના કારણે યાત્રાળુઓ અટવાયા
અલથાણ વિસ્તારના 14 લોકોનું ગ્રૂપ કેદારનાથ દર્શન માટે ઉત્તરાખંડ પહોંચ્યું હતું. જોકે, સતત વરસાદ અને પ્રતિકૂળ હવામાનના કારણે યાત્રીઓની મુશ્કેલી વધી હતી. પરિસ્થિતિને કારણે સમગ્ર ગ્રૂપ ત્યાં જ અટવાઈ ગયું હતું.
ગ્રૂપના ત્રણ સભ્યોને હેલિકોપ્ટર મારફતે રેસ્ક્યૂ કરીને સલામત સ્થળે ખસેડવામાં આવ્યા છે. જોકે, બાકીના 11 લોકો હજુ કેદારનાથ વિસ્તારમાં ફસાયેલા હોવાનો પરિવારજનોનો દાવો છે.
રંજનબેનનો વીડિયો સામે આવ્યો
આ દરમિયાન અલથાણના રંજનબેન પંચાલનો એક વીડિયો સોશિયલ મીડિયા પર સામે આવ્યો છે. વીડિયોમાં તેઓ કેદારનાથથી મદદ માટે ભાવુક અપીલ કરતા જોવા મળે છે.
રંજનબેને વીડિયોમાં જણાવ્યું કે તેઓ બે દિવસ પહેલાં કેદારનાથ પહોંચ્યા હતા અને સતત વરસાદના કારણે ત્યાં ફસાઈ ગયા છે. તેમણે ગુજરાત સરકારને તેમના ગ્રૂપને સુરક્ષિત રીતે બહાર કાઢવા માટે મદદ કરવાની અપીલ કરી છે.
વીડિયો દરમિયાન તેઓ ભાવુક થઈ જાય છે અને આંખોમાં આંસુ સાથે મદદ માટે વિનંતી કરતા જોવા મળે છે.
તંબુઓમાં આશરો લેવાની સ્થિતિ
રંજનબેને વીડિયોમાં આસપાસની પરિસ્થિતિ પણ બતાવી છે. વીડિયોમાં અન્ય યાત્રાળુઓ અને તંબુઓમાં આશરો લઈ રહેલા લોકો જોવા મળે છે. આસપાસના વિસ્તારમાં ધુમ્મસ અને વરસાદી વાતાવરણને કારણે મુશ્કેલ સ્થિતિ સર્જાઈ હોવાનું વીડિયોમાં દેખાઈ રહ્યું છે.
પરિવારજનોમાં ચિંતા
સુરતમાં રહેલા યાત્રાળુઓના પરિવારજનો આ સમગ્ર સ્થિતિને કારણે ચિંતામાં મુકાયા છે. પરિવારજનોનો આક્ષેપ છે કે સ્થાનિક સ્તરે પૂરતી માહિતી અને મદદ મળી રહી નથી.
હવે પરિવારજનો ગુજરાત સરકાર અને ડિઝાસ્ટર મેનેજમેન્ટ તંત્રને તાત્કાલિક હસ્તક્ષેપ કરી ઉત્તરાખંડ પ્રશાસન સાથે સંકલન કરવા અપીલ કરી રહ્યા છે. તેમનો આગ્રહ છે કે કેદારનાથમાં ફસાયેલા બાકીના 11 શ્રદ્ધાળુઓને પણ સુરક્ષિત સ્થળે ખસેડવામાં આવે અને શક્ય હોય તો તેમને એરલિફ્ટ કરીને સુરત પરત લાવવામાં આવે.
હાલ પરિવારજનોની મુખ્ય માંગ ફસાયેલા તમામ શ્રદ્ધાળુઓને સુરક્ષિત રીતે બહાર કાઢવાની છે.