બાબા કેદારના ભક્તો માટે કપાટ ખુલવાની આતુરતા વચ્ચે કુદરતે પોતાનો અલગ જ રંગ દેખાડ્યો છે. હિમાલયના શિખરો પર અચાનક બદલાયેલા હવામાનને કારણે એપ્રિલ મહિનામાં પણ કેદારનાથ ધામમાં ભારે હિમવર્ષા શરૂ થઈ છે. આ સતત હિમવર્ષાને કારણે ચારધામ યાત્રાની તૈયારીઓમાં જોતરાયેલા તંત્ર અને શ્રમજીવી માટે મુશ્કેલીઓ વધતી જઈ રહી છે.
આ વર્ષે 22 એપ્રિલે કેદારનાથ ધામના કપાટ ખુલવાના છે. તેને ધ્યાનમાં રાખીને વહીવટીતંત્ર અને બદ્રી-કેદાર મંદિર સમિતિ (BKTC) દ્વારા મંદિર પરિસર તેમજ પદયાત્રા માર્ગો પર તૈયારીઓ ઝડપી ગતિએ ચાલી રહી હતી. પરંતુ છેલ્લા 24 કલાકથી થઈ રહેલી ભારે હિમવર્ષાએ તમામ તૈયારીઓ પર બ્રેક લગાવી દીધી છે.
મંદિર પરિસર અને પદયાત્રા માર્ગો પરથી થોડા દિવસ પહેલા જ બરફ હટાવવામાં આવ્યો હતો, પરંતુ નવી હિમવર્ષાને કારણે માર્ગો ફરીથી અનેક ફૂટ બરફ નીચે દટાઈ ગયા છે. જેના કારણે શ્રમજીવીઓની મહેનત પર પાણી ફરી વળ્યું છે.
BKTCના સભ્ય વિનીત પોસ્તીના જણાવ્યા મુજબ કેદારપુરીમાં હવામાન પળવારમાં બદલાઈ રહ્યું છે. સતત બરફવર્ષાને કારણે પદયાત્રા માર્ગોની સફાઈ ફરીથી કરવી પડી રહી છે. સાથે જ રહેવાની વ્યવસ્થા માટે તૈયાર થતી ટેન્ટ કોલોનીનું કામ પણ અટકી પડ્યું છે. વીજળી અને પાણી જેવી મૂળભૂત સુવિધાઓ ઉભી કરવામાં પણ ભારે અડચણો આવી રહી છે.
સામાન્ય રીતે એપ્રિલ મહિનામાં બરફ પીગળવાની પ્રક્રિયા શરૂ થતી હોય છે, પરંતુ આ વર્ષે તેની વિરુદ્ધ સ્થિતિ જોવા મળી રહી છે. જો આગામી દિવસોમાં પણ હવામાન આવું જ રહેશે, તો 22 એપ્રિલ પહેલા તમામ તૈયારીઓ પૂર્ણ કરવી તંત્ર માટે મોટો પડકાર બની શકે છે.
હિમવર્ષાને કારણે કેદારનાથ પદયાત્રા માર્ગ પર ગ્લેશિયર તૂટવાનો ખતરો પણ વધ્યો છે. પ્રશાસને શ્રદ્ધાળુઓને હવામાનની તાજી માહિતી મેળવીને જ યાત્રાનું આયોજન કરવાની સલાહ આપી છે. જો કપાટ ખુલતા પહેલા માર્ગોથી બરફ સંપૂર્ણ રીતે દૂર નહીં થાય, તો શરૂઆતના દિવસોમાં યાત્રીઓની સંખ્યામાં મર્યાદા મૂકવામાં આવી શકે છે.
