હરમનપ્રીત કૌરે છોડી ભારતીય મહિલા ક્રિકેટ ટીમની કેપ્ટનશીપ, સ્મૃતિ મંધાનાનું નામ ચર્ચામાં

ભારતીય મહિલા ક્રિકેટ ટીમમાં મોટો ફેરફાર થયો છે. સ્ટાર ખેલાડી અને લાંબા સમયથી ટીમની કેપ્ટન રહેલી હરમનપ્રીત કૌરે તમામ ફોર્મેટની કેપ્ટનશીપ છોડવાનો નિર્ણય જાહેર કર્યો છે. હરમનપ્રીતે મંગળવારે સોશિયલ મીડિયા પોસ્ટ દ્વારા પોતાના નિર્ણયની જાણકારી આપી હતી.

હરમનપ્રીતની જગ્યાએ હવે ટીમની કમાન સ્મૃતિ મંધાનાને સોંપવામાં આવે તેવી શક્યતા છે. જોકે, નવા કેપ્ટન અંગે સત્તાવાર જાહેરાતની રાહ જોવાઈ રહી છે.

વર્લ્ડ કપ વિજય સહિત અનેક ઐતિહાસિક સિદ્ધિઓ

હરમનપ્રીત કૌરની કેપ્ટનશીપમાં ભારતીય મહિલા ટીમે અનેક મોટી સિદ્ધિઓ મેળવી છે. ખાસ કરીને 2025ના મહિલા વનડે વર્લ્ડ કપમાં ભારતે પ્રથમ વખત ખિતાબ જીત્યો હતો. આ સાથે હરમનપ્રીત વર્લ્ડ કપ જીતનારી પ્રથમ ભારતીય મહિલા કેપ્ટન બની હતી.

તેની આગેવાનીમાં ભારતે એશિયા કપમાં પણ સફળતા મેળવી હતી. 2012, 2016, 2022 અને 2026માં ભારતે એશિયા કપનો ખિતાબ પોતાના નામે કર્યો હતો. જોકે, 2012માં હરમનપ્રીતે માત્ર ફાઇનલમાં ટીમની કેપ્ટનશીપ કરી હતી, જ્યારે બાકીની મેચોમાં મિતાલી રાજે ટીમનું નેતૃત્વ કર્યું હતું.

બેટિંગમાં પણ બનાવ્યા અનેક રેકોર્ડ

હરમનપ્રીત માત્ર કેપ્ટન તરીકે જ નહીં, પરંતુ બેટર તરીકે પણ ભારતીય ક્રિકેટમાં પોતાની આગવી ઓળખ બનાવી છે. 2017ના વર્લ્ડ કપની સેમિફાઇનલમાં ઓસ્ટ્રેલિયા સામે તેની અણનમ 171 રનની ઇનિંગ્સ આજે પણ મહિલા ક્રિકેટની યાદગાર ઇનિંગ્સમાં ગણાય છે.

2018માં ન્યૂઝીલેન્ડ સામે T20 આંતરરાષ્ટ્રીયમાં સદી ફટકારીને તે આ ફોર્મેટમાં સદી કરનારી પ્રથમ ભારતીય મહિલા ક્રિકેટર બની હતી.

2026માં હરમનપ્રીતે વધુ એક ઐતિહાસિક સિદ્ધિ મેળવી હતી. તે પુરુષ કે મહિલા ક્રિકેટમાં 200 આંતરરાષ્ટ્રીય T20 મેચ રમનારી વિશ્વની પ્રથમ ક્રિકેટર બની હતી. ફેબ્રુઆરી 2026માં 356મી આંતરરાષ્ટ્રીય મેચ સાથે તે મહિલા ક્રિકેટમાં સૌથી વધુ આંતરરાષ્ટ્રીય મેચ રમનારી ખેલાડી પણ બની હતી.

સપ્ટેમ્બર 2026માં તેણે 150 T20I મેચોમાં કેપ્ટનશીપ કરનાર વિશ્વની પ્રથમ ક્રિકેટર બનીને વધુ એક રેકોર્ડ પોતાના નામે કર્યો.

એશિયન ગેમ્સમાં પણ બે ગોલ્ડ

હરમનપ્રીતની આગેવાનીમાં ભારતીય મહિલા ટીમે એશિયન ગેમ્સમાં સતત બે વખત ગોલ્ડ મેડલ જીત્યો હતો. 2022ની હાંગઝોઉ એશિયન ગેમ્સમાં ભારતે શ્રીલંકાને હરાવીને સુવર્ણ ચંદ્રક જીત્યો હતો. ત્યારબાદ 2026ની નાગોયા એશિયન ગેમ્સમાં પણ ભારતે શ્રીલંકાને હરાવીને ગોલ્ડ મેડલ જાળવી રાખ્યો હતો.

સન્માનોથી પણ નવાજાઈ

હરમનપ્રીત કૌરને 2017માં ક્રિકેટ ક્ષેત્રે ઉત્કૃષ્ટ યોગદાન બદલ અર્જુન એવોર્ડથી સન્માનિત કરવામાં આવી હતી. 2026માં તેમને દેશના ચોથા સર્વોચ્ચ નાગરિક સન્માન પદ્મશ્રીથી પણ નવાજવામાં આવ્યા હતા.

કેપ્ટન તરીકેની જવાબદારી છોડવા અંગે હરમનપ્રીતે જણાવ્યું કે આ નિર્ણય સરળ નહોતો અને તેમાં વર્ષોની યાદો, લાગણીઓ, ત્યાગ અને જીવનભર યાદ રહે તેવી અનેક ક્ષણો જોડાયેલી છે.

હવે ભારતીય મહિલા ક્રિકેટ ટીમના આગામી તબક્કામાં સ્મૃતિ મંધાના નેતૃત્વ સંભાળે છે કે અન્ય કોઈ ખેલાડીને તક મળે છે, તેના પર સૌની નજર છે.