અમદાવાદ: ગુજરાતના વાહનચાલકો માટે ફરી એકવાર મોંઘવારીના માઠા સમાચાર સામે આવ્યા છે. અદાણી ગેસ દ્વારા કમ્પ્રેસ્ડ નેચરલ ગેસ (CNG)ના ભાવમાં પ્રતિ કિલો રૂ. ૨.૨૪નો તોતિંગ વધારો ઝીંકી દેવામાં આવ્યો છે. આ નવો ભાવ વધારો આજ (૧૬મી મે)થી જ અમલમાં આવી ગયો છે, જેના કારણે સામાન્ય જનતા અને મધ્યમ વર્ગના ખિસ્સા પર સીધો આર્થિક બોજ વધશે. પેટ્રોલ-ડીઝલના મોંઘા ખર્ચથી બચવા માટે જે લોકોએ સીએનજી વાહનો ખરીદ્યા હતા, તેઓ હવે સરકાર અને કંપનીઓની નીતિઓ સામે લાચાર બન્યા છે.
નવા વધારા બાદ હવે ગુજરાતમાં અદાણી સીએનજીનો ભાવ પ્રતિ કિલો રૂ. ૮૬.૧ પર પહોંચી ગયો છે. નોંધનીય છે કે, છેલ્લા થોડા સમયથી અદાણી સીએનજીના ભાવમાં સતત વધારો થઈ રહ્યો છે. આ પહેલા ચોથી એપ્રિલે પણ પ્રતિ કિલો રૂ. ૧.૫નો વધારો કરવામાં આવ્યો હતો. એટલે કે છેલ્લા દોઢ મહિનામાં જ કુલ મળીને અંદાજે રૂ. ૩.૭૪ જેટલો વધારો નોંધાઈ ચૂક્યો છે. આ સતત વધતા ભાવોને કારણે વાહનચાલકો ભારે ચિંતામાં મુકાયા છે.
સીએનજીના ભાવ આસમાને પહોંચતા સમાજના અનેક વર્ગો પર તેની સીધી અને નકારાત્મક અસર જોવા મળશે:
રિક્ષા અને ટેક્સી ચાલકો: રોજિંદી કમાણી કરતા ગરીબ અને મધ્યમ વર્ગના રિક્ષા-ટેક્સી ચાલકોની આવક પર મોટો કાપ મુકાશે, કારણ કે સીએનજી મોંઘો થવા છતાં ભાડાં તાત્કાલિક વધારી શકાતા નથી.
વાલીઓ પર બોજ: ઇંધણ મોંઘું થતાં આગામી શૈક્ષણિક સત્રથી સ્કૂલ વાન અને ઓટો રિક્ષાના ભાડામાં પણ વધારો થઈ શકે છે, જે વાલીઓનું બજેટ બગાડશે.
નોકરિયાત વર્ગ: રોજિંદા ધંધા કે નોકરી માટે પોતાના સીએનજી વાહન દ્વારા અપ-ડાઉન કરતા મધ્યમ વર્ગના લોકોનું માસિક બજેટ સંપૂર્ણપણે ખોરવાઈ જશે.
