ગુજરાતમાં હાલ અંગ દઝાડતી ગરમીનો પ્રકોપ જોવા મળી રહ્યો છે. હવામાન વિભાગની આગાહી મુજબ આગામી બે દિવસ સુધી રાજ્યમાં ગરમીનું જોર યથાવત્ રહેશે અને અનેક જિલ્લાઓમાં હીટવેવ જેવી પરિસ્થિતિ સર્જાશે. અમદાવાદ સહિત રાજ્યના મોટાભાગના શહેરોમાં તાપમાન 44 ડિગ્રીને પાર પહોંચતાં જનજીવન પ્રભાવિત થયું છે.
અમદાવાદ સૌથી ગરમ, ગાંધીનગર અને કંડલામાં પણ તાપમાન ઊંચું
છેલ્લા 24 કલાકના આંકડાઓ મુજબ અમદાવાદમાં 44.8 ડિગ્રી અને ગાંધીનગરમાં 44.2 ડિગ્રી તાપમાન નોંધાયું છે. કંડલા એરપોર્ટ પર પણ 44.2 ડિગ્રી સાથે ભારે ગરમીનો અહેસાસ થયો હતો. આજે (27 એપ્રિલ) પણ અમદાવાદ અને ગાંધીનગરમાં તાપમાન 44 ડિગ્રી આસપાસ રહેવાની શક્યતા છે, જેને કારણે લોકોને બફારા અને લૂનો સામનો કરવો પડી શકે છે.
આણંદ શહેરમાં પણ ગરમીનો કહેર
આણંદ શહેરમાં પણ ગરમીનો પ્રકોપ સતત વધી રહ્યો છે. આણંદમાં તાપમાન લગભગ 42 થી 43 ડિગ્રી વચ્ચે નોંધાઈ રહ્યું છે, જેના કારણે બપોરના સમયે રસ્તાઓ પર લોકોની અવરજવર ઘટી ગઈ છે. ગરમીના કારણે દૈનિક જીવનમાં અડચણો ઉભી થઈ રહી છે અને નાગરિકો ઘરમાં રહેવાનું પસંદ કરી રહ્યા છે.
કચ્છ-સૌરાષ્ટ્રમાં હીટવેવ, યલો એલર્ટ જાહેર
હવામાન વિભાગે આગામી દિવસોમાં ખાસ કરીને કચ્છ અને સૌરાષ્ટ્રના વિસ્તારોમાં હીટવેવની આગાહી કરી છે. 28 એપ્રિલે કચ્છ, રાજકોટ, સુરેન્દ્રનગર, મોરબી અને પાટણ જિલ્લામાં યલો એલર્ટ જાહેર કરવામાં આવ્યું છે. આ પરિસ્થિતિને ધ્યાનમાં રાખીને નાગરિકોને બપોરના સમયે બિનજરૂરી બહાર ન નીકળવા અને સાવચેતી રાખવા સૂચના આપવામાં આવી છે.
3 દિવસ બાદ મળશે આંશિક રાહત
ગરમીના આ તીવ્ર પ્રકોપ વચ્ચે રાહતના સમાચાર પણ સામે આવ્યા છે. હવામાન વિભાગ મુજબ આગામી 3 દિવસ બાદ તાપમાનમાં આશરે 3 ડિગ્રીનો ઘટાડો થવાની શક્યતા છે. જોકે આગામી 7 દિવસ સુધી વાતાવરણ સૂકું રહેશે, પરંતુ તાપમાનમાં થોડી રાહત મળતા નાગરિકોને રાહતનો શ્વાસ મળશે.
આરોગ્ય વિભાગની સલાહ: સાવચેતી જરૂરી
હીટવેવની આગાહીને પગલે આરોગ્ય વિભાગે નાગરિકોને ખાસ સાવચેતી રાખવા અનુરોધ કર્યો છે. બપોરના સમયે બહાર જવાનું ટાળવું, પૂરતું પાણી અને પ્રવાહી પદાર્થો લેવાં, તેમજ હળવા અને સુતરાઉ કપડાં પહેરવા જેવી સલાહ આપવામાં આવી છે. ગરમી સામે સાવચેતી રાખવી હાલ અત્યંત જરૂરી બની ગઈ છે.
