ગુજરાતમાં ગેરકાયદે રીતે વસવાટ કરતા બાંગ્લાદેશી નાગરિકો સામે રાજ્ય સરકાર અને પોલીસ તંત્ર દ્વારા વ્યાપક અભિયાન શરૂ કરવામાં આવ્યું છે. ગૃહ વિભાગના નિર્દેશ બાદ અમદાવાદ, રાજકોટ, ભરૂચ સહિતના વિવિધ શહેરોમાં પોલીસ દ્વારા સર્ચ ઓપરેશન હાથ ધરવામાં આવ્યું છે. ખાસ કરીને અમદાવાદ શહેરમાં સ્થાનિક પોલીસ અને ક્રાઈમ બ્રાન્ચની સંયુક્ત ટીમોએ મોડી રાત્રે મેગા સર્ચ ઓપરેશન ચલાવી મોટી કાર્યવાહી કરી હતી.
પોલીસ દ્વારા કરવામાં આવેલી કાર્યવાહી દરમિયાન અમદાવાદમાંથી અત્યાર સુધીમાં 131 જેટલા ગેરકાયદે રીતે રહેતા બાંગ્લાદેશી નાગરિકોની અટકાયત કરવામાં આવી હોવાનું સામે આવ્યું છે. આ ઉપરાંત આશરે 160 જેટલા શંકાસ્પદ વ્યક્તિઓની પૂછપરછ કરવામાં આવી રહી છે. તેમની ઓળખ, રહેઠાણ અને દસ્તાવેજોની ખરાઈ માટે ક્રાઈમ બ્રાન્ચ દ્વારા સઘન તપાસ હાથ ધરવામાં આવી છે.
અમદાવાદના ચંડોળા, ગુલાબનગર, ખોડિયારનગર સહિતના વિસ્તારોમાં પોલીસની ટીમોએ દરોડા પાડી તપાસ કરી હતી. લાંબા સમયથી આ વિસ્તારોમાં ગેરકાયદે ઘૂસણખોરો વસવાટ કરતા હોવાની મળેલી માહિતીના આધારે કાર્યવાહી કરવામાં આવી હોવાનું જાણવા મળ્યું છે. પોલીસ દ્વારા આધાર કાર્ડ, ઓળખપત્રો અને અન્ય જરૂરી દસ્તાવેજોની ચકાસણી કરવામાં આવી રહી છે.
રાજ્ય સરકારના નિર્દેશ બાદ શરૂ કરાયેલા આ રાજ્યવ્યાપી અભિયાનનો મુખ્ય હેતુ દેશમાં ગેરકાયદે રીતે પ્રવેશ કરીને વસવાટ કરતા વિદેશી નાગરિકોને શોધી કાઢવાનો છે. પોલીસ અધિકારીઓના જણાવ્યા અનુસાર તપાસ પૂર્ણ થયા બાદ ગેરકાયદે હોવાનું સાબિત થનારાઓ સામે કાયદેસરની કાર્યવાહી કરવામાં આવશે.
રાજ્યભરમાં ચાલી રહેલા આ સર્ચ ઓપરેશનને લઈને સુરક્ષા એજન્સીઓ પણ સતર્ક બની છે. આગામી દિવસોમાં અન્ય શહેરોમાં પણ આવી જ કાર્યવાહી વધુ તેજ બનવાની શક્યતા વ્યક્ત કરવામાં આવી રહી છે, જેના કારણે ગેરકાયદે વસવાટ કરનારાઓ સામે વધુ કડક પગલાં લેવામાં આવી શકે છે.