ગુજરાતમાં દક્ષિણ-પશ્ચિમ ચોમાસાની વિદાયની પ્રક્રિયા શરૂ થઈ ગઈ છે. હાલ ચોમાસાની વાપસીની રેખા ડીસા અને નળિયામાંથી પસાર થઈ રહી છે. બીજી તરફ, મધ્ય ઉત્તર પ્રદેશમાં સક્રિય લો પ્રેશર અને સાયક્લોનિક સર્ક્યુલેશન સિસ્ટમ આગામી 12 કલાકમાં નબળી પડવાની સંભાવના છે.
ગુજરાતમાં નીચલા સ્તરે પશ્ચિમી પવનો ફૂંકાઈ રહ્યા હોવાથી આગામી દિવસોમાં રાજ્યના કેટલાક વિસ્તારોમાં વરસાદી માહોલ જોવા મળી શકે છે. હવામાન વિભાગના અનુમાન મુજબ 4 ઓક્ટોબર સુધી રાજ્યના વિવિધ ભાગોમાં હળવાથી મધ્યમ વરસાદના ઝાપટાં પડી શકે છે.
30 સપ્ટેમ્બર અને 1 ઓક્ટોબરે વરસાદની શક્યતા
હવામાન વિભાગના ડાયરેક્ટર ડૉ. એ. કે. દાસના જણાવ્યા અનુસાર 30 સપ્ટેમ્બર અને 1 ઓક્ટોબર દરમિયાન ગુજરાતના કેટલાક વિસ્તારોમાં હળવાથી મધ્યમ વરસાદ પડી શકે છે. ખાસ કરીને સૌરાષ્ટ્ર-કચ્છ અને દક્ષિણ ગુજરાતના કેટલાક વિસ્તારોમાં વરસાદી ઝાપટાંની શક્યતા છે.
જોકે, આગામી એક સપ્તાહ દરમિયાન રાજ્યમાં ભારે વરસાદની કોઈ શક્યતા વ્યક્ત કરવામાં આવી નથી. એટલે ચોમાસાની વિદાય વચ્ચે છૂટાછવાયા વરસાદ સુધી જ સ્થિતિ મર્યાદિત રહેવાની શક્યતા છે.
અમદાવાદમાં વાદળછાયું વાતાવરણ
આજે અમદાવાદમાં આકાશ વાદળછાયું રહેવાની આગાહી કરવામાં આવી છે. શહેરમાં વરસાદી ઝાપટાં પડવાની શક્યતા વચ્ચે વાતાવરણમાં ભેજ પણ અનુભવાઈ શકે છે.
દરિયાકાંઠે પવનનું જોર વધશે, માછીમારોને સાવચેતી
રાજ્યના દરિયાકાંઠાના વિસ્તારોમાં આજે 30થી 40 કિલોમીટર પ્રતિ કલાકની ઝડપે પવન ફૂંકાવાની શક્યતા છે. દરિયામાં પવનનું જોર વધવાની આગાહીને પગલે હવામાન વિભાગ દ્વારા માછીમારોને આજે દરિયો ન ખેડવાની સૂચના આપવામાં આવી છે.
હાલ ગુજરાતમાં ચોમાસાની વિદાયની પ્રક્રિયા આગળ વધી રહી છે, ત્યારે આગામી દિવસોમાં હળવાથી મધ્યમ વરસાદ અને વાદળછાયા વાતાવરણ વચ્ચે તાપમાનમાં પણ સ્થાનિક સ્તરે ફેરફાર જોવા મળી શકે છે.