ગાંધીનગર: ગુજરાતના ગૃહ વિભાગ દ્વારા રાજ્યના પોલીસ તંત્રમાં અત્યાર સુધીનો સૌથી મોટો ફેરફાર કરવામાં આવ્યો છે. એકસાથે 37 જેટલા ઉચ્ચ IPS અધિકારીઓની બદલીના આદેશ જાહેર કરવામાં આવ્યા છે. આ બદલીઓમાં સૌથી વધુ ચર્ચાસ્પદ નામ નિર્લિપ્ત રાયનું છે, જેમને સ્ટેટ મોનિટરિંગ સેલ (SMC) માંથી હટાવીને રાજકોટ રેન્જના DIGP તરીકે નિયુક્ત કરવામાં આવ્યા છે. આ સાથે જ રાઘવેન્દ્ર વત્સને અમદાવાદ રેન્જના નવા IGP તરીકેની જવાબદારી સોંપવામાં આવી છે.
નિર્લિપ્ત રાયની બદલી અને SMCમાં નવા સમીકરણો
રાજ્યમાં દારૂ અને જુગારના અડ્ડાઓ પર કડક કાર્યવાહી માટે જાણીતા IPS નિર્લિપ્ત રાયની SMCમાંથી વિદાય એ પોલીસ બેડામાં ચર્ચાનો વિષય બની છે. તેમને હવે રાજકોટ રેન્જની કમાન સોંપવામાં આવી છે, જ્યાં અશોક કુમારની બદલીથી ખાલી પડેલી જગ્યા પર તેમની નિમણૂક થઈ છે. બીજી તરફ, SMCનો વધારાનો હવાલો ગગનદીપ ગંભીરને સોંપવામાં આવ્યો છે, જ્યારે વિશાલકુમાર વાઘેલાને SMCના DIGP તરીકે મૂકવામાં આવ્યા છે.
અમદાવાદ અને સુરત રેન્જમાં મોટા ફેરફાર
અમદાવાદ રેન્જની જવાબદારી હવે રાઘવેન્દ્ર વત્સ સંભાળશે, જેઓ અગાઉ સુરતમાં JCP (ક્રાઈમ) તરીકે કાર્યરત હતા. આ ઉપરાંત, શમશેર સિંઘને વેઇટિંગ ફોર પોસ્ટિંગમાંથી મુક્ત કરી ડાયરેક્ટર, સિવિલ ડિફેન્સ અને કમાન્ડન્ટ જનરલ (હોમ ગાર્ડ્સ) જેવી મહત્વની જવાબદારી સોંપાઈ છે. સુરતના સ્પેશિયલ સીપી વાબાંગ જામીરની બદલી કરવામાં આવી છે પરંતુ હાલ તેમને કોઈ નવી પોસ્ટિંગ આપવામાં આવી નથી.
વહીવટી સુધારા માટે પોસ્ટનું અપગ્રેડેશન અને ડાઉનગ્રેડેશન
ગૃહ વિભાગના સત્તાવાર આદેશ મુજબ, આ બદલીઓ જાહેર હિતમાં કરવામાં આવી છે. રાજ્યમાં કાયદો અને વ્યવસ્થાની સ્થિતિને વધુ મજબૂત બનાવવા માટે કેટલીક જગ્યાઓએ પોસ્ટને 'અપગ્રેડ' કરવામાં આવી છે, જ્યારે કેટલીક જગ્યાએ 'ડાઉનગ્રેડ' કરીને જે-તે ગ્રેડના અધિકારીઓની નિમણૂક કરવામાં આવી છે. ખાસ કરીને જેલ વિભાગ, એન્ટી કરપ્શન બ્યુરો (ACB) અને ટ્રાફિક વિભાગમાં પણ નોંધપાત્ર ફેરફારો જોવા મળ્યા છે.
મહત્વની નવી નિમણૂકો એક નજરે:
અશોક કુમાર: IGP, CID (ઇન્ટેલિજન્સ), ગાંધીનગર.
મકરંદ ચૌહાણ: DIGP (લો એન્ડ ઓર્ડર), ગાંધીનગર.
પરીક્ષિતા રાઠોડ: IGP, બનાસકાંઠા રેન્જ, પાલનપુર.
નિલેશ જાજડિયા: JCP (સેક્ટર-2), વડોદરા.
એ.જી. ચૌહાણ: JCP (ટ્રાફિક), અમદાવાદ શહેર.
