ગાંધીનગર: ગુજરાત વિધાનસભાના બજેટ સત્રના ત્રીજા દિવસે આજે રાજ્યનું ભાવિ નક્કી કરતું નાણાકીય વર્ષ 2026-27નું અંદાજપત્ર રજૂ થવા જઈ રહ્યું છે. નાણામંત્રી કનુ દેસાઈ સતત પાંચમી વખત બજેટ રજૂ કરીને એક નવો વિક્રમ સ્થાપિત કરશે. આ વર્ષનું બજેટ માત્ર આંકડાઓની માયાજાળ નહીં, પરંતુ આગામી કોમનવેલ્થ ગેમ્સ 2030 અને રાજ્યની મહાનગરપાલિકાની ચૂંટણીઓને ધ્યાનમાં રાખીને તૈયાર કરાયેલું 'માસ્ટરસ્ટ્રોક' સાબિત થઈ શકે છે. નિષ્ણાતોના મતે, આ વખતે ગુજરાતનું બજેટ ₹4,10,000 કરોડથી ₹4,22,000 કરોડની ઐતિહાસિક સપાટી વટાવી શકે છે, જેનું મુખ્ય કારણ વધતું આંતરમાળખાકીય રોકાણ અને સામાજિક કલ્યાણની યોજનાઓ છે.
આ વખતના બજેટમાં 'વિકસિત ગુજરાત @ 2047' ના વિઝન સાથે GYAN (ગરીબ, યુવા, અન્નદાતા અને નારી શક્તિ) મોડેલ પર વિશેષ ભાર મૂકવામાં આવશે. રમતગમત ક્ષેત્રે અમદાવાદને ગ્લોબલ સ્પોર્ટ્સ હબ બનાવવા માટે ₹2,000 થી ₹5,000 કરોડની ફાળવણી સાથે 'વર્લ્ડ ક્લાસ સ્પોર્ટ્સ ડિસ્ટ્રિક્ટ' વિકસાવવાની જાહેરાત થઈ શકે છે. આ ઉપરાંત, સેમિકન્ડક્ટર હબ તરીકે સાણંદ અને ધોલેરાના વિકાસ, ગિફ્ટ સિટીનું વિસ્તરણ અને ગ્રીન હાઇડ્રોજન મિશન જેવી મહત્વાકાંક્ષી યોજનાઓ માટે પણ મોટી જોગવાઈઓની શક્યતા છે.
ખેડૂતો માટે ડ્રોન ટેકનોલોજી અને નેનો યુરિયા પર સબસિડી તેમજ શહેરી વિસ્તારોમાં મેટ્રો કનેક્ટિવિટી અને ઇલેક્ટ્રિક બસોના નેટવર્કને મજબૂત કરવા પર ધ્યાન કેન્દ્રિત કરાશે. જોકે, વધતા જતા જાહેર દેવા સામે વિકાસની ગતિ જાળવી રાખવી એ સરકાર માટે મુખ્ય પડકાર રહેશે. શિક્ષણ ક્ષેત્રે ₹60,000 કરોડ અને આરોગ્ય ક્ષેત્રે ₹28,000 કરોડથી વધુની ફાળવણી સાથે આ બજેટ દરેક વર્ગના લોકોને સ્પર્શતું રહે તેવો પ્રયાસ નાણામંત્રી દ્વારા કરવામાં આવશે.
