1️⃣ નોટબંધી કેસમાં એક્સિસ બેન્કને ઝટકો
નોટબંધી દરમિયાન જૂની ચલણી નોટો સ્વીકારવાનો ઈનકાર કરવાના મામલે રાષ્ટ્રીય ગ્રાહક વિવાદ નિવારણ પંચ (NCDRC)એ એક્સિસ બેન્કને મોટો ઝટકો આપ્યો છે. પંચે દિલ્હી સ્થિત પ્રોક્યોર લોજિસ્ટિક્સ સર્વિસીસ પ્રા. લિ. નામની કંપનીને રૂ. 3.19 કરોડની ચૂકવણી કરવાનો આદેશ કર્યો છે.
2️⃣ સેવામાં ખામી બદલ બેન્ક દોષિત
એનસીડીઆરસીની બેન્ચે સુનાવણી દરમિયાન જણાવ્યું કે નોટબંધી પછી સરકાર દ્વારા નક્કી કરેલી સમયમર્યાદામાં રદ કરાયેલી નોટો બેન્ક ખાતામાં જમા કરવાની મંજૂરી હતી, છતાં એક્સિસ બેન્કે કંપનીની વારંવાર વિનંતી છતાં તેના KYCવાળા ખાતામાં નોટો જમા કરવાની મંજૂરી આપી નહોતી. તેથી બેન્કને ‘સેવામાં ખામી’ માટે જવાબદાર ઠેરવવામાં આવી છે.
3️⃣ સમયમર્યાદા પૂરી થતાં કંપનીને નુકસાન
પંચના જણાવ્યા મુજબ બેન્કના ઇનકારના કારણે કંપની પાસે રહેલી નોટો સમયમર્યાદા પૂરી થતાં બેકાર થઈ ગઈ, જેના કારણે કંપનીને સીધું આર્થિક નુકસાન થયું. જો બેન્કને લેવડદેવડ અંગે શંકા હતી તો તે સંબંધિત સત્તાવાળાઓને જાણ કરી શકી હોત.
4️⃣ વ્યાજ સહિત ચુકવણીનો આદેશ
પંચે એક્સિસ બેન્કને આદેશ આપ્યો છે કે કંપનીને રૂ. 3.19 કરોડની રકમ 9 ટકા વ્યાજ સાથે બે મહિનાની અંદર ચૂકવી દેવામાં આવે.