ગુજરાતના જનપ્રતિનિધિઓ માટે સુવિધાઓમાં વધુ એક મહત્વપૂર્ણ વધારો કરવામાં આવ્યો છે. અત્યાર સુધી રાજ્યના ધારાસભ્યોને તમામ ટ્રેનોના ફર્સ્ટ અને સેકન્ડ એસી ક્લાસમાં મફત મુસાફરીની સુવિધા ઉપલબ્ધ હતી, પરંતુ હવે આ સુવિધાનો વ્યાપ વધારીને વંદે ભારત, દુરંતો અને તેજસ જેવી અદ્યતન પ્રીમિયમ ટ્રેનોને પણ તેમાં સામેલ કરવામાં આવી છે. નવા નિર્ણયથી ધારાસભ્યો હવે વધુ આરામદાયક અને આધુનિક મુસાફરીનો લાભ લઈ શકશે.
નવા નિયમો મુજબ, ધારાસભ્યોને પ્રીમિયમ ટ્રેનોના એક્ઝિક્યુટિવ ક્લાસમાં પણ મફત મુસાફરી કરવાની મંજૂરી આપવામાં આવી છે. આ સુવિધા હેઠળ રાજ્યની અંદર તેઓ વર્ષમાં 10 હજાર કિલોમીટર સુધી અને અન્ય રાજ્યોમાં 20 હજાર કિલોમીટર સુધી મફત મુસાફરી કરી શકશે. આ નિર્ણયથી ધારાસભ્યોને ઝડપી અને સુવિધાસભર મુસાફરીમાં વધુ સહુલિયત મળશે.
રેલવે મુસાફરી ઉપરાંત ધારાસભ્યોને અન્ય અનેક આર્થિક અને રહેણાંક સુવિધાઓ પણ આપવામાં આવી રહી છે. ગાંધીનગરમાં માત્ર 37.50 રૂપિયાના નજીવા ભાડે આલીશાન ફ્લેટ ઉપલબ્ધ કરાવવામાં આવે છે. સાથે જ, પેટ્રોલ અને ડીઝલ પણ માત્ર 10થી 11 રૂપિયાના દરે આપવામાં આવે છે, જે એક પ્રકારની કન્સેશનલ સુવિધા છે. આ ઉપરાંત, વિવિધ પ્રકારના ભથ્થાઓનો લાભ પણ ધારાસભ્યોને મળે છે.
જ્યાં એક તરફ સામાન્ય જનતા ટ્રેનોમાં ભીડ વચ્ચે મુસાફરી કરવા મજબૂર હોય છે, ત્યાં બીજી તરફ ધારાસભ્યો માટે આ પ્રકારની આધુનિક અને સુવિધાસભર સવલતોમાં વધારો થવાથી લોકોમાં મિશ્ર પ્રતિસાદ જોવા મળી રહ્યો છે. કેટલાક લોકો આ નિર્ણયને જરૂરી સુવિધા તરીકે જોવે છે, જ્યારે કેટલાક લોકો તેને અસમાનતા તરીકે પણ જોતા થયા છે.
