દેશભરમાં ચોમાસાએ હવે જોર પકડ્યું છે. ગુજરાત, મહારાષ્ટ્ર, મધ્યપ્રદેશ, ઉત્તરાખંડ સહિત અનેક રાજ્યોમાં ધોધમાર વરસાદને કારણે જનજીવન પ્રભાવિત બન્યું છે. ઉજ્જૈન અને ઉત્તરાખંડમાં અતિ ભારે વરસાદને પગલે નદીઓ ગાંડીતૂર બની ગઈ છે, જ્યારે અનેક નીચાણવાળા વિસ્તારોમાં પાણી ભરાઈ જતાં લોકોને ભારે મુશ્કેલીનો સામનો કરવો પડી રહ્યો છે.
મુંબઈમાં સતત વરસી રહેલા વરસાદને કારણે અનેક વિસ્તારોમાં પાણી ભરાયા છે. મુંબઈ-પુણે એક્સપ્રેસવે પર ભૂસ્ખલનની ઘટના બનતાં વાહનવ્યવહાર પર ગંભીર અસર પહોંચી છે અને સુરક્ષાના ભાગરૂપે કેટલાક માર્ગો તાત્કાલિક બંધ કરવામાં આવ્યા છે. બીજી તરફ ગુજરાતના અનેક જિલ્લાઓમાં પણ ભારે વરસાદને પગલે નદીઓ અને ડેમમાં પાણીની આવક વધી રહી છે.
હવામાન વિભાગે આગામી દિવસોમાં પણ અનેક રાજ્યોમાં અતિ ભારે વરસાદની આગાહી કરી છે અને લોકોને બિનજરૂરી મુસાફરી ટાળવા તેમજ સાવચેત રહેવા અપીલ કરી છે. વહીવટી તંત્ર દ્વારા નીચાણવાળા વિસ્તારો પર સતત નજર રાખવામાં આવી રહી છે અને જરૂરિયાત મુજબ રાહત અને બચાવ કામગીરી પણ શરૂ કરવામાં આવી છે.