આણંદ જિલ્લા પોલીસે ચેક રિટર્ન કેસમાં સજા પામેલા અને લાંબા સમયથી ફરાર રહેલા આરોપીને ઝડપી પાડવામાં સફળતા મેળવી છે. ખંભાત સિટી પોલીસે આ સમગ્ર કાર્યવાહી પોલીસ અધિક્ષક જી.જી. જસાણીના માર્ગદર્શન હેઠળ હાથ ધરી હતી. લાંબા સમયથી પોલીસને ચકમો આપતો આરોપી અંતે પોલીસના જાળમાં આવી ગયો, જેને કારણે જિલ્લામાં કાયદો અને વ્યવસ્થાને વધુ મજબૂત બનાવવાનો સંદેશ મળ્યો છે.
પકડાયેલ આરોપી અજમતઅલી અસગરઅલી શેખ (રહે. આઝાદનગર, કંસારી, ખંભાત)ને પ્રિન્સિપાલ સીનીયર સિવિલ જજ અને એડીશનલ ચીફ જ્યુડિશ્યલ મેજિસ્ટ્રેટની કોર્ટ દ્વારા સજા ફટકારવામાં આવી હતી. નેગોશિયેબલ ઈન્સ્ટ્રુમેન્ટ એક્ટની કલમ 138 હેઠળ નોંધાયેલા સી.સી નં. 129/2025, 503/2025 અને 394/2025 જેવા કેસોમાં આરોપીને દોષિત ઠેરવાયો હતો. સજા જાહેર થયા બાદ આરોપી ફરાર થઈ ગયો હતો અને પોલીસ તેની શોધખોળમાં લાગી હતી.
મળેલી બાતમીના આધારે આરોપી ખંભાતના ત્રણલીમડી વિસ્તારમાં છુપાયો હોવાની માહિતી મળતાં પોલીસે તાત્કાલિક કાર્યવાહી હાથ ધરી હતી. ચોક્કસ માહિતીના આધારે પોલીસ ટીમે રેડ કરીને આરોપીને ઝડપી પાડ્યો હતો. હાલ પોલીસે તેની અટકાયત કરીને આગળની કાયદેસરની કાર્યવાહી શરૂ કરી છે, જેનાથી કાયદાથી ભાગી શકાશે નહીં એવો સ્પષ્ટ સંદેશ આપવાનો પ્રયાસ કરવામાં આવ્યો છે.
