આર્ટિફિશિયલ ઇન્ટેલિજન્સ (AI) ક્ષેત્રની અગ્રણી કંપની OpenAI હવે ChatGPTની સુરક્ષા વ્યવસ્થાને વધુ મજબૂત બનાવવા જઈ રહી છે. કંપનીએ હિંસા, હથિયારો અને સુરક્ષા પ્રણાલીઓ સાથે જોડાયેલી સંવેદનશીલ માહિતી અંગે નવા કડક નિયમો જાહેર કર્યા છે. ખાસ કરીને કિશોર વયના યુઝર્સને ધ્યાનમાં રાખીને આ પગલાં લેવામાં આવી રહ્યાં છે. નવા નિયમો હેઠળ હિંસક પ્રવૃત્તિઓને પ્રોત્સાહન આપી શકે તેવી વ્યવહારુ માહિતી આપવા પર નિયંત્રણ મૂકવામાં આવશે.
હિંસક વાતચીત કરનાર યુઝર્સ પર નજર
નવા સુરક્ષા નિયમો અનુસાર, જો કોઈ યુઝર સતત હિંસા અથવા અન્ય વ્યક્તિને નુકસાન પહોંચાડવા સંબંધિત વાતચીત કરે છે, તો ChatGPT આવી ચેટને આપમેળે બંધ કરી શકે છે. આ પ્રકારનું વર્તન વારંવાર જોવા મળે તો સંબંધિત એકાઉન્ટને અસ્થાયી રીતે સસ્પેન્ડ કરવાની કાર્યવાહી પણ થઈ શકે છે.
કંપનીનો ઉદ્દેશ AIનો ઉપયોગ કોઈ હિંસક પ્રવૃત્તિ માટે ન થાય અને તેના માધ્યમથી કોઈને નુકસાન પહોંચાડવાની શક્યતા ઓછી કરી શકાય તેવો છે.
જૂના હુમલાઓની વિગતો મેળવવી પણ મુશ્કેલ બનશે
OpenAIએ ભૂતકાળમાં થયેલા મોટા સામૂહિક હુમલાઓ અને નરસંહાર સંબંધિત સંવેદનશીલ માહિતી માટે પણ નિયંત્રણો કડક કરવાની જાહેરાત કરી છે. હવે આવા હુમલાઓમાં વપરાયેલા હથિયારો, તેમની ઉપલબ્ધતા અને મેળવવાની પદ્ધતિઓ જેવી વ્યવહારુ વિગતોની માહિતી મર્યાદિત કરવામાં આવશે.
એટલે કે, ઐતિહાસિક ઘટનાઓ વિશે સામાન્ય શૈક્ષણિક માહિતી અને હિંસક પ્રવૃત્તિઓને અંજામ આપવામાં મદદરૂપ થઈ શકે તેવી વિગતો વચ્ચે વધુ કડક ભેદ રાખવામાં આવશે.
આગામી અઠવાડિયાઓમાં અમલીકરણ
કંપનીના જણાવ્યા અનુસાર, નવા સેફ્ટી ફીચર્સ આગામી થોડા અઠવાડિયામાં તબક્કાવાર અમલમાં મૂકવામાં આવશે. આ નિયમોની અસરકારકતા પર સતત નજર રાખવામાં આવશે અને જરૂરિયાત મુજબ સુરક્ષા વ્યવસ્થામાં વધુ ફેરફાર કરવામાં આવશે.
કિશોરો દરરોજ સરેરાશ 15 મિનિટથી ઓછો સમય વાપરે છે
OpenAI દ્વારા જાહેર કરવામાં આવેલા કિશોરોના ChatGPT ઉપયોગ સંબંધિત અહેવાલમાં જણાવાયું હતું કે ટીનએજ યુઝર્સ દરરોજ સરેરાશ 15 મિનિટથી પણ ઓછો સમય આ પ્લેટફોર્મ પર વિતાવે છે. જોકે, કંપનીનું માનવું છે કે ઉપયોગનો સમય ઓછો હોવા છતાં યુવા યુઝર્સની સુરક્ષા સર્વોચ્ચ પ્રાથમિકતા હોવી જોઈએ.
AI પ્લેટફોર્મ પર સુરક્ષાને લઈને વધી રહ્યું છે દબાણ
છેલ્લા કેટલાક સમયથી AI કંપનીઓ પર બાળકો અને કિશોરોની ઓનલાઈન સુરક્ષાને લઈને જવાબદારી વધારવાનું દબાણ વધી રહ્યું છે. Common Sense Mediaના અહેવાલમાં પણ કિશોરો સાથે આત્મહત્યા, સ્વયંને નુકસાન પહોંચાડવા અને ઈટિંગ ડિસઓર્ડર જેવા સંવેદનશીલ વિષયો પર AI ચેટબોટ્સની પ્રતિક્રિયાઓ અંગે ચિંતા વ્યક્ત કરવામાં આવી હતી.
અહેવાલમાં પેરેન્ટ્સને સમયસર ચેતવણી મળવા અને સુરક્ષા વ્યવસ્થાની અસરકારકતા અંગે પણ સવાલો ઉઠાવવામાં આવ્યા હતા.
આ સમગ્ર પરિસ્થિતિ વચ્ચે OpenAIનું નવું પગલું એઆઈ ટેક્નોલોજીના વધતા ઉપયોગ સાથે યુઝર્સની સુરક્ષાને વધુ પ્રાથમિકતા આપવાની દિશામાં મહત્વપૂર્ણ માનવામાં આવી રહ્યું છે.