નવી દિલ્હી: ઈરાન અને અમેરિકા-ઈઝરાયલ વચ્ચે ચાલી રહેલા સંઘર્ષમાં ભલે બે સપ્તાહના સીઝફાયરની જાહેરાત કરવામાં આવી હોય, પરંતુ સ્થિતિની ગંભીરતાને જોતા ભારત સરકારે અત્યંત સાવચેતીભર્યું પગલું ભર્યું છે. ઈરાનની રાજધાની તહેરાન સ્થિત ભારતીય દૂતાવાસે સોશિયલ મીડિયા પ્લેટફોર્મ 'X' પર એક નવી એડવાઇઝરી જારી કરીને ત્યાં વસતા તમામ ભારતીય નાગરિકોને વહેલી તકે સ્વદેશ પરત ફરી જવા અથવા સુરક્ષિત રીતે ઈરાન છોડી દેવા તાકીદ કરી છે. ભારત સરકારનું માનવું છે કે સીઝફાયર છતાં પરિસ્થિતિ ગમે ત્યારે વણસી શકે તેમ છે, તેથી નાગરિકોની સુરક્ષા માટે આ નિર્ણય લેવામાં આવ્યો છે.
દૂતાવાસે પોતાની સૂચનામાં સ્પષ્ટપણે જણાવ્યું છે કે ભારતીય નાગરિકોએ દૂતાવાસ દ્વારા સૂચવવામાં આવેલા અધિકૃત વિકલ્પોનો જ ઉપયોગ કરીને પ્રવાસ કરવો. સૌથી મહત્ત્વની તાકીદ એ કરવામાં આવી છે કે કોઈપણ નાગરિકે દૂતાવાસ સાથે પરામર્શ કે પૂર્વ સંકલન કર્યા વગર આંતરરાષ્ટ્રીય જમીન સરહદ (Land Border) ઓળંગવાનો સાહસિક પ્રયાસ કરવો નહીં. અગાઉ 7 એપ્રિલના રોજ પણ ભારતીયોને 48 કલાક સુધી સલામત સ્થળે રહેવાની સૂચના અપાઈ હતી, પરંતુ હવે સ્થિતિને જોતા સીઝફાયર દરમિયાન જ ભારતીયોને સુરક્ષિત બહાર કાઢી લેવાની રણનીતિ અપનાવવામાં આવી છે.
ઈરાનમાં ફસાયેલા નાગરિકોની સહાયતા માટે ભારત સરકારે વિવિધ ઈમરજન્સી હેલ્પલાઇન નંબરો પણ જાહેર કર્યા છે. જરૂરિયાતના સમયે નાગરિકો +989128109115, +989128109109, +989128109102, અને +989932179359 પર સંપર્ક કરી શકે છે અથવા cons.tehran@mea.gov.in પર ઈ-મેઇલ દ્વારા પણ દૂતાવાસની મદદ માંગી શકે છે. દૂતાવાસની ટીમ સતત નાગરિકોના સંપર્કમાં છે અને તેમને વતન પરત લાવવા માટે તમામ શક્ય વ્યવસ્થાઓ પર નજર રાખી રહી છે.
ઉલ્લેખનીય છે કે ગત 28 ફેબ્રુઆરીએ જ્યારે અમેરિકા અને ઈઝરાયલ દ્વારા ઈરાન પર હુમલા કરવામાં આવ્યા ત્યારે ત્યાં અંદાજે 9,000 ભારતીયો હાજર હતા, જેમાં મોટી સંખ્યામાં વિદ્યાર્થીઓનો સમાવેશ થાય છે. અત્યાર સુધીમાં ભારત સરકારના પ્રયાસોથી આશરે 1,800 ભારતીયો સુરક્ષિત રીતે વતન પરત ફરી ચૂક્યા છે. બાકીના ભારતીયોને પણ વહેલી તકે અને સુરક્ષિત રીતે બહાર કાઢવા માટે સરકાર હાલ યુદ્ધના ધોરણે કામ કરી રહી છે.
