બોરસદ નગરપાલિકામાં લાંબા સમયથી ખાલી પડેલી જગ્યાઓ અને વર્ષોથી હંગામી ધોરણે સેવા આપી રહેલા કર્મચારીઓના મુદ્દે હવે રજૂઆત કરવામાં આવી છે. વોર્ડ નંબર 9ના નગરસેવક ભરત રોહિતે નગરપાલિકા સમક્ષ બંને મુદ્દાઓને આગામી સામાન્ય બોર્ડ બેઠકના એજન્ડામાં સામેલ કરવાની માગ કરી છે.
રજૂઆત મુજબ, નગરપાલિકામાં છેલ્લા ઘણા વર્ષોથી અંદાજે 110 જગ્યાઓ ખાલી છે. આ જગ્યાઓ તાત્કાલિક ધોરણે ભરવામાં આવે તેવી માગ સાથે નગરપાલિકાની કામગીરી અને કર્મચારીઓ પરના વધતા ભારનો મુદ્દો પણ ઉઠાવવામાં આવ્યો છે.
બીજી તરફ, નગરપાલિકામાં લાંબા સમયથી હંગામી, દૈનિક વેતન અને ઉચ્ચક ધોરણે ફરજ બજાવતા કર્મચારીઓના કાયમીકરણનો પ્રશ્ન પણ રજૂઆતમાં મુખ્ય રીતે ઉઠાવવામાં આવ્યો છે. કેટલાક કર્મચારીઓ 10, 15, 20 અને 25 વર્ષથી વધુ સમયથી સેવા આપી રહ્યા હોવાનો દાવો કરવામાં આવ્યો છે.
કાયદાકીય જોગવાઈઓનો પણ ઉલ્લેખ
ભરત રોહિતે પોતાની રજૂઆતમાં ગુજરાત નગરપાલિકા અધિનિયમ, 1963ની સંબંધિત જોગવાઈઓનો ઉલ્લેખ કર્યો છે. ખાસ કરીને કલમ 271(ડી) અને 271(જી) હેઠળ નગરપાલિકાના મહેકમ, કર્મચારીઓની નિમણૂક, ફરજો અને સેવાની શરતો અંગેની જોગવાઈઓ તરફ ધ્યાન દોરવામાં આવ્યું છે.
આ ઉપરાંત, સુપ્રીમ કોર્ટના સ્ટેટ ઓફ કર્ણાટક વિરુદ્ધ ઉમાદેવી કેસના ચુકાદાનો પણ સંદર્ભ આપવામાં આવ્યો છે. રજૂઆતમાં જણાવાયું છે કે મંજૂર જગ્યાઓ સામે જરૂરી લાયકાત ધરાવતા અને લાંબા સમયથી સતત સેવા આપતા કર્મચારીઓના નિયમિતીકરણ અંગે કાયદાકીય જોગવાઈઓને આધારે યોગ્ય કિસ્સામાં વિચારણા થઈ શકે છે.
વિભાગવાર યાદી તૈયાર કરવાની માગ
રજૂઆતમાં નગરપાલિકામાં ઉચ્ચક, દૈનિક વેતન અને હંગામી ધોરણે ફરજ બજાવતા કર્મચારીઓની વિભાગવાર યાદી તૈયાર કરવા પણ માગ કરવામાં આવી છે. આ યાદીમાં દરેક કર્મચારીનું નામ, હોદ્દો અને કેટલા વર્ષથી સેવા આપી રહ્યા છે તેની વિગતો સામેલ કરવામાં આવે તેવી માગ છે.
આ તમામ વિગતોના આધારે કાયદાકીય અને બંધારણીય જોગવાઈઓને ધ્યાનમાં રાખીને કર્મચારીઓના હિતમાં યોગ્ય નિર્ણય લેવામાં આવે તેવી રજૂઆત કરવામાં આવી છે.
હવે આ બંને મુદ્દાઓ આગામી સામાન્ય બોર્ડ બેઠકમાં ચર્ચા માટે આવે છે કે કેમ અને નગરપાલિકા દ્વારા ખાલી જગ્યાઓ તેમજ લાંબા સમયથી હંગામી સેવા આપતા કર્મચારીઓ અંગે શું નિર્ણય લેવામાં આવે છે તેના પર સૌની નજર રહેશે.