નાલંદા (બિહાર): બિહારના નાલંદા જિલ્લામાંથી એક હૃદયદ્રાવક સમાચાર સામે આવ્યા છે. ચૈત્ર મહિનાના છેલ્લા મંગળવાર નિમિત્તે શીતલા માતાના મંદિરે દર્શન કરવા ગયેલા શ્રદ્ધાળુઓની ભીડમાં અચાનક નાસભાગ મચી ગઈ હતી. આ ગોઝારી દુર્ઘટનામાં અત્યાર સુધીમાં 8 લોકોના મોત થયા હોવાની પુષ્ટિ થઈ છે, જ્યારે અનેક લોકો ગંભીર રીતે ઘાયલ થયા છે. હાલ સ્થાનિક પોલીસ અને વહીવટીતંત્ર દ્વારા રેસ્ક્યૂ ઓપરેશન ચલાવવામાં આવી રહ્યું છે.
પ્રાપ્ત વિગતો અનુસાર, ચૈત્ર માસનો અંતિમ મંગળવાર હોવાના કારણે વહેલી સવારથી જ શીતલા માતાના મંદિરમાં દર્શનાર્થીઓનું ઘોડાપૂર ઉમટી પડ્યું હતું. પરંતુ, મંદિર પરિસરમાં ભીડને નિયંત્રિત કરવા માટે પોલીસ કે વહીવટીતંત્રનો કોઈ જડબેસલાક બંદોબસ્ત ન હતો. દર્શન કરવાની ઉતાવળમાં કેટલાક શ્રદ્ધાળુઓએ કતાર તોડીને આગળ વધવાનો પ્રયાસ કર્યો હતો, જેના કારણે અફરાતફરીનો માહોલ સર્જાયો હતો. અચાનક ભીડ બેકાબૂ બનતા લોકો એકબીજા પર પડવા લાગ્યા હતા અને જોતજોતામાં ભયાનક નાસભાગ મચી ગઈ હતી.
સ્થાનિક પ્રત્યક્ષદર્શીઓએ આ ગંભીર હોનારત માટે સીધી રીતે પોલીસ અને વહીવટીતંત્રની ઘોર બેદરકારીને જવાબદાર ઠેરવી છે. ઉલ્લેખનીય છે કે, હાલમાં ભારતના રાષ્ટ્રપતિ દ્રૌપદી મુર્મૂ પણ નાલંદાની મુલાકાતે છે અને તેઓ નાલંદા યુનિવર્સિટીના દીક્ષાંત સમારોહમાં હાજરી આપવા પહોંચ્યા છે. લોકોનો આક્ષેપ છે કે, સમગ્ર જિલ્લા વહીવટીતંત્ર અને પોલીસ કાફલાનું ધ્યાન રાષ્ટ્રપતિના કાર્યક્રમ અને સુરક્ષા વ્યવસ્થામાં કેન્દ્રિત હતું. જેના કારણે લાખોની ભીડ એકઠી થવાની સંભાવના હોવા છતાં શીતલા મંદિરે પૂરતો બંદોબસ્ત ફાળવવામાં આવ્યો નહોતો, જે અંતે શ્રદ્ધાળુઓ માટે ઘાતક સાબિત થયો.
ઘટનાની ગંભીરતાને જોતા પોલીસ કાફલો તાત્કાલિક ઘટનાસ્થળે પહોંચી ગયો હતો અને ઘાયલોને એમ્બ્યુલન્સ મારફતે નજીકની હોસ્પિટલોમાં ખસેડવાની કામગીરી હાથ ધરી હતી. તબીબો દ્વારા અત્યાર સુધીમાં 8 લોકોને મૃત જાહેર કરવામાં આવ્યા છે, જ્યારે અડધો ડઝનથી વધુ લોકો હજુ પણ હોસ્પિટલમાં સારવાર હેઠળ છે. આ ગોઝારી ઘટનાને પગલે સમગ્ર જિલ્લામાં શોકનું મોજું ફરી વળ્યું છે અને મૃતકોના પરિજનોમાં ભારે રોષ જોવા મળી રહ્યો છે. લોકો હવે આ બેદરકારી મામલે ઉચ્ચ સ્તરીય તપાસની માંગ કરી રહ્યા છે.
