નવી દિલ્હી: દેશમાં હાલ હવામાનના બે વિરોધાભાસી મિજાજ જોવા મળી રહ્યા છે. ભારતીય હવામાન વિભાગ (IMD) ના જણાવ્યા અનુસાર, દેશના દક્ષિણી દરિયાકાંઠાના વિસ્તારોમાં ચોમાસાની સિઝન સત્તાવાર રીતે શરૂ થઈ ગઈ છે. આંદામાન સાગર અને નિકોબાર દ્વીપસમૂહમાં ચોમાસું તેના નિયત સમય કરતાં 6 દિવસ વહેલા દસ્તક આપી ચૂક્યું છે. સામાન્ય રીતે ચોમાસું 1 જૂને કેરળ પહોંચતું હોય છે, પરંતુ આ વર્ષે 26 મે સુધીમાં જ તે કેરળના તટ પર પહોંચી જવાની પ્રબળ સંભાવના છે. અરબી સમુદ્ર અને બંગાળની ખાડીમાં મોન્સૂન ઝડપથી આગળ વધી રહ્યું હોવાથી કેરળના પથનમથિટ્ટા અને અલપ્પુઝા જેવા વિસ્તારોમાં ભારે વરસાદની આશંકા સેવાઈ રહી છે, જ્યારે પશ્ચિમ બંગાળના કેટલાક ભાગોમાં પણ છેલ્લા 24 કલાકમાં સારો વરસાદ નોંધાયો છે.
બીજી તરફ, દિલ્હી-NCR, ઉત્તર પ્રદેશ, હરિયાણા અને પંજાબ સહિત સમગ્ર ઉત્તર ભારત હાલ કાળઝાળ ગરમી અને ભીષણ લૂની લપેટમાં હોમાઈ રહ્યું છે. સવારે 10 વાગ્યા પછી જ લોકોનું ઘરની બહાર નીકળવું મુશ્કેલ બની ગયું છે. ઉત્તર પ્રદેશના બાંદામાં સમગ્ર ઉત્તર ભારતમાં સૌથી વધુ 46.4 ડિગ્રી સેલ્સિયસ તાપમાન નોંધાયું છે. આ સિવાય ઝાંસી, પ્રયાગરાજ, વારાણસી અને લખનૌમાં પણ સ્થિતિ ગંભીર છે. હરિયાણા-પંજાબના સિરસા, રોહતક, હિસાર અને ભટિંડા જેવા શહેરોમાં પારો 42 થી 44 ડિગ્રી વચ્ચે રહ્યો છે, જ્યારે ચંદીગઢમાં પણ તાપમાન 40 ડિગ્રીને પાર પહોંચી ગયું છે. રાજસ્થાનના સરહદી વિસ્તારોમાં પણ ભયંકર ગરમી સાથે પારો 44 ડિગ્રીની આસપાસ સ્થિર થયો છે.
મેદાની વિસ્તારોની સાથે સાથે પહાડી પ્રદેશોમાં પણ આ વખતે ગરમીનો પ્રકોપ જોવા મળી રહ્યો છે, જ્યાં હિમાચલ પ્રદેશના ઉનામાં તાપમાન 37.4 ડિગ્રી સેલ્સિયસ સુધી પહોંચી ગયું છે. જો કે, પહાડી વિસ્તારો માટે રાહતના સમાચાર એ છે કે 19 મેથી ત્યાં એક નવું વેસ્ટર્ન ડિસ્ટર્બન્સ (Western Disturbance) સક્રિય થવા જઈ રહ્યું છે, જેને પગલે ચંબા, કાંગડા અને કુલ્લુ જેવા વિસ્તારો માટે 'યેલો એલર્ટ' જાહેર કરાયું છે અને 22-23 મેના રોજ વરસાદ પડવાથી ગરમીથી રાહત મળશે. આગામી 24 કલાકમાં ઉત્તર ભારતમાં લૂ વધુ તીવ્ર બનવાની આશંકા વચ્ચે હવામાન વિભાગે એડવાઈઝરી જાહેર કરીને લોકોને બપોરે 12 થી 3 વાગ્યા દરમિયાન તડકામાં ન નીકળવા, વારંવાર પાણી, ઓઆરએસ, છાશ કે લીંબુ પાણી પીવા અને હળવા રંગના સુતરાઉ કપડાં પહેરીને જ બહાર નીકળવા ખાસ અપીલ કરી છે.
