ગાંધીનગર: ભારતીય જનતા પાર્ટીએ આજે પોતાના પ્રભાવશાળી પ્રવાસના 46 વર્ષ પૂર્ણ કરી સ્થાપના દિવસની ઉત્સાહભેર ઉજવણી કરી છે. આ અવસરે ગુજરાત ભાજપના પ્રદેશ કાર્યાલય ‘કમલમ’ ખાતે એક વિશેષ કાર્યક્રમનું આયોજન કરવામાં આવ્યું હતું. મુખ્યમંત્રી ભુપેન્દ્ર પટેલ અને પ્રદેશ અધ્યક્ષ જગદીશ વિશ્વકર્માની પ્રેરક ઉપસ્થિતિમાં ધ્વજવંદન કરી પાર્ટીના સ્થાપકોને ભાવભીની શ્રદ્ધાંજલિ અર્પણ કરવામાં આવી હતી. આ કાર્યક્રમમાં ભાજપના ધારાસભ્યો, વરિષ્ઠ આગેવાનો અને મોટી સંખ્યામાં કાર્યકરોએ હાજર રહી સંગઠન પ્રત્યે પોતાની પ્રતિબદ્ધતા દોહરાવી હતી.
કાર્યક્રમ દરમિયાન સંબોધન કરતા પ્રદેશ અધ્યક્ષ જગદીશ વિશ્વકર્માએ પાર્ટીના કપરા સમયને યાદ કર્યો હતો. તેમણે જણાવ્યું કે, એક સમય એવો હતો જ્યારે જનસંઘમાં કાર્યકર્તાઓની ભારે અછત હતી, પરંતુ આજે કાર્યકરોની અથાક મહેનતને કારણે ભાજપ વિશ્વની સૌથી મોટી રાજકીય પાર્ટી બની છે. 1951માં જનસંઘની સ્થાપનાથી લઈ 1984ની લોકસભા ચૂંટણીમાં માત્ર 2 બેઠકો મેળવનાર ભાજપ આજે "શાન અને સમૃદ્ધ ભારત"નું પ્રતિક બની છે. તેમણે ડો. શ્યામા પ્રસાદ મુખર્જીના બલિદાન અને કટોકટી કાળના સંઘર્ષને યાદ કરી કાર્યકર્તાઓને નવી ઊર્જા પૂરી પાડી હતી.
મુખ્યમંત્રી ભુપેન્દ્ર પટેલે પોતાના પ્રવચનમાં જણાવ્યું કે, ભાજપનું નેતૃત્વ અત્યંત મજબૂત છે અને જનતાની અપેક્ષાઓ હવે કાર્યકર્તાઓ સાથે જોડાયેલી છે. તેમણે સરકારના લોકહિતના નિર્ણયોનો ઉલ્લેખ કરતા જણાવ્યું કે, પેટ્રોલ-ડીઝલના ભાવ કાબૂમાં રાખવા માટે એક્સાઇઝ ડ્યુટીમાં ઘટાડો જેવા પગલાં લેવામાં આવ્યા છે. વધુમાં તેમણે કાર્યકર્તાઓને સલાહ આપી હતી કે, રાજકીય ચર્ચાઓ કે વિવાદો દરમિયાન સંયમ જાળવવો અને ધીરજપૂર્વક જવાબ આપવો જરૂરી છે. તેમણે સ્પષ્ટ કર્યું કે સરકારનો હેતુ માત્ર રાજકારણ કરવાનો નથી પરંતુ જનસેવાનો છે.
આ ઉજવણી દ્વારા ભાજપે તેના ગૌરવશાળી ઈતિહાસ અને વિકાસયાત્રાને તાજી કરી હતી. નેતાઓએ કાર્યકર્તાઓના સમર્પણની પ્રશંસા કરી અને આવનારા સમયમાં પણ સેવાભાવ સાથે આગળ વધવા માટે આહ્વાન કર્યું હતું. શિસ્ત, સંયમ અને સંગઠન શક્તિના જોરે ભાજપ આગામી દિવસોમાં નવા શિખરો સર કરશે તેવો વિશ્વાસ આ તકે વ્યક્ત કરવામાં આવ્યો હતો.
