પાંચ રાજ્યોની વિધાનસભા ચૂંટણીના પરિણામો જાહેર થયા બાદ નરેન્દ્ર મોદીએ દિલ્હીમાં સ્થિત ભારતીય જનતા પાર્ટીના મુખ્ય કાર્યાલય ખાતે ઉપસ્થિત કાર્યકરોને સંબોધન કર્યું હતું. પોતાના ભાષણ દરમિયાન વડાપ્રધાને આજના દિવસને ઐતિહાસિક અને અભૂતપૂર્વ ગણાવ્યો હતો.
વડાપ્રધાન મોદીએ જણાવ્યું કે વર્ષોની મહેનત અને સાધનાનું ફળ આજે સિદ્ધિરૂપે સામે આવ્યું છે, જેના કારણે દેશભરના ભાજપના કાર્યકરોના ચહેરા પર ખુશી અને ગૌરવ સ્પષ્ટપણે દેખાઈ રહ્યું છે. તેમણે કહ્યું કે એક કાર્યકર્તા તરીકે તેઓ દરેક કાર્યકર્તાની ખુશીમાં સામેલ છે અને આ જીત સમગ્ર પાર્ટીના સમર્પણનું પ્રતિબિંબ છે.
આગળ તેમણે ઉમેર્યું કે આજનો દિવસ માત્ર જીતનો નથી, પરંતુ દેશના ઉજ્જવળ ભવિષ્યની ઘોષણાનો દિવસ છે. ભારતના મહાન લોકતંત્ર પર અને “પરફોર્મન્સની રાજનીતિ” પર દેશવાસીઓએ ફરી એકવાર વિશ્વાસ વ્યક્ત કર્યો છે. “એક ભારત, શ્રેષ્ઠ ભારત”ના વિઝનને લોકોનો વ્યાપક સમર્થન મળ્યું છે, જે આગામી સમયમાં દેશને નવી ઊંચાઈઓએ પહોંચાડશે.
