આણંદ: એક્સપ્રેસ હાઇવે પર બેડવા સીમ વિસ્તારમાં આવેલા ઓવરબ્રિજ પર રાહદારીઓની સુરક્ષા સામે સવાલો ઊભા થયા છે. ઓવરબ્રિજની બંને બાજુ રાહદારીઓ માટે બનાવવામાં આવેલો પગદંડી માર્ગ હાલમાં જર્જરિત હાલતમાં જોવા મળી રહ્યો છે. જેના કારણે અહીંથી પસાર થતા રાહદારીઓને મુશ્કેલીનો સામનો કરવો પડી રહ્યો છે.
મળતી માહિતી પ્રમાણે, આશરે બે વર્ષ અગાઉ ઓવરબ્રિજ પર મરામતની કામગીરી હાથ ધરવામાં આવી હતી. જોકે સ્થાનિકોના આક્ષેપ મુજબ તે સમયે માત્ર સામાન્ય સમારકામ કરીને કામગીરી પૂર્ણ થયાનો રિપોર્ટ રજૂ કરવામાં આવ્યો હતો. હવે બે વર્ષમાં જ પગદંડી માર્ગની હાલત ફરી ખરાબ થતાં અગાઉ થયેલી કામગીરીની ગુણવત્તા સામે પણ સવાલો ઊભા થયા છે.
પગદંડી તૂટતાં રાહદારીઓ માટે જોખમ
ઓવરબ્રિજ પર પગદંડી માર્ગના વિવિધ ભાગો બિસ્માર થઈ ગયા છે. માર્ગ તૂટેલી હાલતમાં હોવાથી રાહદારીઓને જોખમ વચ્ચે પસાર થવાની ફરજ પડી રહી છે. સાથે જ હાઇવે પર ઝડપથી પસાર થતાં વાહનોને કારણે કોઈ અનિચ્છનીય ઘટના સર્જાવાની ભીતિ પણ વ્યક્ત કરવામાં આવી રહી છે.
સ્થાનિકોના જણાવ્યા પ્રમાણે, બ્રિજ પર વાહનોની અવરજવર સતત રહેતી હોવાથી અહીં રસ્તાની નાની ખામી પણ ગંભીર અકસ્માતનું કારણ બની શકે છે.
બ્રિજની સુરક્ષા અંગે પણ ચિંતા
તાજેતરમાં ગંભીરા ઓવરબ્રિજ ધરાશાયી થવાની ઘટનાને પગલે રાજ્યમાં બ્રિજની સુરક્ષા અને તેની સ્થિતિ અંગે ચર્ચા તેજ બની હતી. ત્યારબાદ સરકારે વિવિધ બ્રિજના સર્વે અને સલામતી તપાસના આદેશ આપ્યા હતા.
આ પરિસ્થિતિ વચ્ચે બેડવા ઓવરબ્રિજ પર પગદંડી માર્ગની બિસ્માર સ્થિતિ સામે આવતા તંત્રની કામગીરી પર પણ સવાલો ઉઠી રહ્યા છે.
ફરિયાદ બાદ એન્જિનિયરિંગ ટીમને સ્થળ પર મોકલાશે
હાઇવે ઓથોરિટીના ઉચ્ચ અધિકારીઓના જણાવ્યા અનુસાર, પગદંડી માર્ગ અંગેની ફરિયાદને ગંભીરતાથી લેવામાં આવી છે. અધિકારીઓએ એન્જિનિયરિંગ ટીમને સ્થળ પર મોકલીને સ્થિતિની તપાસ કરવા તેમજ જરૂરી મરામત કામગીરી તાત્કાલિક શરૂ કરવા સૂચના આપી છે.
હવે તંત્ર દ્વારા માત્ર તાત્કાલિક પેચવર્ક કરવામાં આવે છે કે પછી પગદંડી માર્ગનું કાયમી અને ગુણવત્તાયુક્ત સમારકામ કરવામાં આવે છે, તેના પર સૌની નજર છે.
બે વર્ષમાં જ કામની ગુણવત્તા સામે સવાલ
બે વર્ષ અગાઉ મરામત થયા બાદ ફરી પગદંડી માર્ગ જર્જરિત બનતાં સ્થાનિક રહીશોમાં રોષ જોવા મળી રહ્યો છે. સ્થાનિકોની માંગ છે કે અગાઉ કરવામાં આવેલી કામગીરીની ગુણવત્તાની તપાસ કરવામાં આવે અને જવાબદારી નક્કી કરવામાં આવે.
સાથે જ હજારો વાહનચાલકો અને રાહદારીઓની સુરક્ષાને ધ્યાનમાં રાખીને મરામત કામગીરી ઝડપથી અને ટકાઉ ગુણવત્તા સાથે પૂર્ણ કરવામાં આવે, તેવી માંગ ઉઠી છે.