અમદાવાદ: શહેરના સરદાર વલ્લભભાઈ પટેલ ઇન્ટરનેશનલ કાર્ગો એરપોર્ટ પરથી એક ચોંકાવનારી ઘટના પ્રકાશમાં આવી છે. અમદાવાદથી બેંગ્લોર મોકલવામાં આવેલું ₹2.58 કરોડની કિંમતના સોનાના દાગીનાનું પાર્સલ રહસ્યમય રીતે ગુમ થતા સમગ્ર એરપોર્ટ પર ચકચાર મચી ગઈ છે. આ મામલે લોજિસ્ટિક્સ કંપનીએ આકાશા એરલાઇન્સ વિરુદ્ધ બેદરકારી અને વિશ્વાસઘાતની પોલીસ ફરિયાદ નોંધાવી છે.
શું છે સમગ્ર મામલો?
મૂળ ન્યુ રાણીપના રહેવાસી અને લોજિસ્ટિક્સ કંપનીમાં સિક્યોરિટી મેનેજર તરીકે ફરજ બજાવતા રીછપાલસિંઘ રાઠોડે આ અંગે એરપોર્ટ પોલીસ સ્ટેશનમાં ફરિયાદ નોંધાવી છે. વિગતો મુજબ:
ઘટનાની તારીખ: 18 એપ્રિલ
કુલ પાર્સલ: એક જ્વેલર્સ દ્વારા 7 પાર્સલ બેંગ્લોર મોકલવા માટે સોંપાયા હતા.
ગુમ થયેલ માલ: 13 કિલો વજનનું એક પાર્સલ, જેમાં 2 કિલો 107 ગ્રામ સોનાના દાગીના હતા.
કિંમત: અંદાજે ₹2.58 કરોડ.
ફ્લાઈટ વિગત: આકાશા એરની ફ્લાઈટ નંબર QP-1901 મારફતે મોકલવાના હતા.
અમદાવાદથી લોડ થયા, બેંગ્લોરમાં એક ઓછું નીકળ્યું
લોજિસ્ટિક્સ કંપનીએ 18 એપ્રિલના રોજ વહેલી સવારે 2:15 વાગ્યે અમદાવાદ કાર્ગો એરપોર્ટ પર એરલાઇન્સને તમામ 7 પાર્સલ સુરક્ષિત રીતે સોંપ્યા હતા અને તેની પહોંચ (રિસીપ્ટ) પણ મેળવી હતી. જોકે, જ્યારે ફ્લાઈટ બેંગ્લોર પહોંચી અને ત્યાં ડિલિવરી લેવામાં આવી ત્યારે આશ્ચર્યજનક રીતે માત્ર 6 જ પાર્સલ મળી આવ્યા હતા. ₹2.58 કરોડની કિંમતનું સોનાનું પાર્સલ ગાયબ હતું.
એરલાઇન્સ સ્ટાફના વિરોધાભાસી નિવેદનો
આ ઘટના બાદ લોજિસ્ટિક્સ કંપનીએ તપાસ કરતા એરલાઇન્સના સ્ટાફ તરફથી ગોળ-ગોળ જવાબો મળ્યા હતા:
અમદાવાદ સ્ટાફ: દાવો કર્યો કે તમામ 7 પાર્સલ પ્લેનમાં લોડ કરી દેવામાં આવ્યા છે.
બેંગ્લોર સ્ટાફ: જણાવ્યું કે પ્લેનમાંથી માત્ર 6 જ પાર્સલ ઉતર્યા છે.
લાંબી પૂછપરછ અને તપાસ છતાં આકાશા એરલાઇન્સ દ્વારા કોઈ સંતોષકારક જવાબ ન મળતા આખરે મામલો પોલીસ સ્ટેશને પહોંચ્યો છે. લોજિસ્ટિક કંપનીએ એરલાઇન્સ પર છેતરપિંડી અને વિશ્વાસઘાતનો આરોપ લગાવી કાયદેસરની કાર્યવાહી હાથ ધરી છે.
