બોરીયાવી નજીક પોલીસે ગોઠવી વોચ; કાર અને બિયર સહિત રૂ.13 લાખનો મુદ્દામાલ કબજે
આણંદ: આણંદ ગ્રામ્ય પોલીસે નેશનલ હાઈવે નંબર 48 પર દારૂની હેરાફેરી સામે કાર્યવાહી કરતાં 100 પેટી બિયર ભરેલી કાર ઝડપી પાડી છે. બાતમીના આધારે બોરીયાવી નજીક પોલીસે વોચ ગોઠવી આ કાર્યવાહી હાથ ધરી હતી. જોકે, પોલીસ કારચાલકને પકડે તે પહેલાં જ તે અંધારાનો લાભ લઈને ફરાર થઈ ગયો હતો. પોલીસે કાર અને બિયરનો જથ્થો મળી કુલ રૂ.13 લાખનો મુદ્દામાલ કબજે કરી વધુ તપાસ હાથ ધરી છે.
બાતમીના આધારે પોલીસે ગોઠવી વોચ
પોલીસ સૂત્રો પાસેથી મળતી માહિતી અનુસાર, આણંદ ગ્રામ્ય પોલીસની ટીમ હાઈવે પર પેટ્રોલિંગ કરી રહી હતી. આ દરમિયાન નેશનલ હાઈવે નંબર 48 પરથી એક કારમાં વિદેશી દારૂનો જથ્થો લઈ જવામાં આવનાર હોવાની બાતમી મળી હતી. બાતમીના આધારે પોલીસે બોરીયાવી નજીક સીમ પાસે વોચ ગોઠવી હતી.
પોલીસને જોઈ કારચાલક ફરાર
બાતમીમાં દર્શાવેલા વર્ણન મુજબની કાર ત્યાંથી પસાર થતાં પોલીસે તેને અટકાવવાનો પ્રયાસ કર્યો હતો. આ દરમિયાન ચાલકે કાર સાઇડમાં પાર્ક કરી હતી અને કારનું વ્હીલ પણ નીકળી ગયું હતું. પોલીસ ટીમ કારચાલકને પકડવા આગળ વધે તે પહેલાં જ તે અંધારાનો લાભ લઈને સ્થળ પરથી ફરાર થઈ ગયો હતો.
કારમાંથી 100 પેટી બિયર મળી
પોલીસે કારની તપાસ કરતાં તેમાંથી બિયરની 100 પેટી મળી આવી હતી. આ બિયરનો જથ્થો અંદાજે રૂ.3 લાખની કિંમતનો હોવાનું જાણવા મળ્યું છે. પોલીસે કાર અને બિયરનો જથ્થો મળી કુલ રૂ.13 લાખનો મુદ્દામાલ કબજે કર્યો છે.
હાલમાં આણંદ ગ્રામ્ય પોલીસે ફરાર કારચાલકને શોધવા સહિતની આગળની કાર્યવાહી હાથ ધરી છે. બિયરની હેરાફેરીમાં અન્ય કોઈની સંડોવણી છે કે કેમ તે દિશામાં પણ તપાસ કરવામાં આવી શકે છે.
આણંદ ગ્રામ્ય પોલીસની આ કાર્યવાહીથી હાઈવે પર દારૂની હેરાફેરી કરતા તત્ત્વોમાં ફફડાટ ફેલાયો છે.