આણંદ: આણંદ જિલ્લાની ઉમરેઠ વિધાનસભા બેઠક પર યોજાયેલી હાઈવોલ્ટેજ પેટાચૂંટણીના પરિણામો જાહેર થઈ ગયા છે. આ બેઠક પર ભારતીય જનતા પાર્ટીએ પોતાનું વર્ચસ્વ જાળવી રાખતા ભવ્ય વિજય મેળવ્યો છે. ભાજપના ઉમેદવાર હર્ષદભાઈ પરમારે કોંગ્રેસના ઉમેદવારને પછાડીને પિતાનો વારસો અને ભાજપનો ગઢ અકબંધ રાખ્યો છે.
ઉમરેઠ વિધાનસભા બેઠકની પેટાચૂંટણીમાં ભાજપના ઉમેદવાર હર્ષદભાઈ ગોવિંદભાઈ પરમારે શાનદાર પ્રદર્શન કરતા 30,000થી વધુ મતોના જંગી માર્જિનથી વિજય મેળવ્યો છે. ઉલ્લેખનીય છે કે, પૂર્વ ધારાસભ્ય સ્વ. ગોવિંદભાઈ પરમારના આકસ્મિક અવસાન બાદ આ બેઠક ખાલી પડી હતી. ભાજપે સહાનુભૂતિ અને સ્થાનિક સમીકરણોને ધ્યાને રાખી તેમના પુત્ર હર્ષદભાઈ પર વિશ્વાસ વ્યક્ત કર્યો હતો, જે તેમણે સાર્થક કરી બતાવ્યો છે.
બીજી તરફ, પરાજિત થયેલા કોંગ્રેસના ઉમેદવાર ભૃગુરાજસિંહ ચૌહાણે પોતાની હાર બાદ વિવાદિત નિવેદન આપ્યું છે. તેમણે હાર સ્વીકારવા છતાં EVM (ઈલેક્ટ્રોનિક વોટિંગ મશીન) સામે ગંભીર સવાલો ઉઠાવ્યા છે. ભૃગુરાજસિંહે આક્ષેપ કર્યો હતો કે, તેમની હાર પાછળ EVMમાં થયેલી ગરબડ જવાબદાર હોઈ શકે છે. મતદાનના દિવસથી જ બંને પક્ષો વચ્ચે રાજકીય ગરમાવો જોવા મળ્યો હતો, જે હવે આક્ષેપ-પ્રતિઆક્ષેપ સુધી પહોંચ્યો છે.
ચૂંટણી જંગની વિગતો
મતદાન તારીખ: 23મી એપ્રિલ, 2026
કુલ મતદાન: 59.04 ટકા
કુલ ઉમેદવારો: 6 (મુખ્ય ટક્કર ભાજપ અને કોંગ્રેસ વચ્ચે)
મતદારોની સંખ્યા: 2.45 લાખ નોંધાયેલા મતદારો
મતદાન મથકો: 306 મથકો પર શાંતિપૂર્ણ મતદાન
સમગ્ર ગુજરાતમાં સ્થાનિક સ્વરાજની ચૂંટણીઓના માહોલ વચ્ચે ઉમરેઠ પેટાચૂંટણીના આ પરિણામોએ રાજકીય વર્તુળોમાં ચર્ચા જગાવી છે. ભાજપે આ જીત સાથે સાબિત કર્યું છે કે ચરોતરના આ પંથકમાં હજુ પણ તેમનું પકડ મજબૂત છે.
