મજરા ગામ (પ્રાંતિજ તાલુકો) પોતાની અંદાજે 500 વર્ષ જૂની અનોખી હોળી પરંપરાને કારણે સમગ્ર ગુજરાતમાં આકર્ષણનું કેન્દ્ર બન્યું છે. હોળીની રાત્રે ગામના સુપ્રસિદ્ધ ભૈરવનાથ મંદિરના ચોકમાં બે અલગ-અલગ હોળી પ્રગટાવવામાં આવે છે—એક લાકડાંની અને બીજી છાણાંની. લાકડાંની હોળી લાલચોળ અંગારાઓમાં ફેરવાય બાદ ગામના બાળકોથી લઈને વૃદ્ધો સુધીના ભક્તો નિર્ભયતાથી ખુલ્લા પગે અંગારાઓ પર ચાલે છે. સ્થાનિકોના જણાવ્યા મુજબ, દાયકાઓથી ચાલતી આ પરંપરામાં દાઝવાની કોઈ ઘટના નોંધાઈ નથી, જેને ગ્રામજનો દાદા ભૈરવનાથની કૃપા માને છે.
આ પ્રસંગે મહેસાણા, અમદાવાદ, મોડાસા અને ગાંધીનગર સહિત વિવિધ શહેરોમાંથી હજારો ભક્તો ઉમટી પડે છે. નવપરિણીત દંપતિઓ પ્રદક્ષિણા કરી આશીર્વાદ લે છે, જ્યારે ખેડૂતો હોળીની જ્યોતમાંથી પૂળા લઈ સમૃદ્ધિ માટે પ્રાર્થના કરે છે. વિશાળ જનમેદનીને ધ્યાનમાં રાખીને સ્થાનિક પોલીસ દ્વારા ચુસ્ત બંદોબસ્ત ગોઠવવામાં આવે છે. આ રીતે, મજરા ગામની આ ઐતિહાસિક પરંપરા આજે પણ એકતા, શ્રદ્ધા અને સંસ્કૃતિનો જીવંત વારસો બની અડીખમ ઊભી છે.
