🚩30 વર્ષ બાદ આણંદમાં ફરી દોઢ કિમી લાંબી ગણેશ વિસર્જન યાત્રા!

🚩30 વર્ષ બાદ આણંદમાં ફરી દોઢ કિમી લાંબી ગણેશ વિસર્જન યાત્રા!

આણંદમાં ગણેશ વિસર્જનને લઈને મહત્વના સમાચાર સામે આવ્યા છે. આ વખતે 32 ગણેશ મંડળો વિસર્જન યાત્રામાં જોડાવાના છે, જેના કારણે આશરે દોઢ કિલોમીટર લાંબી વિસર્જન યાત્રા 30 વર્ષ બાદ નીકળશે.

આણંદમાં છેલ્લા 40 વર્ષથી 125થી વધુ મંડળો દ્વારા ગણેશજીની સ્થાપના કરવામાં આવે છે. શરૂઆતના વર્ષોમાં 40થી વધુ મંડળો એકસાથે વિસર્જન યાત્રામાં જોડાતા હતા. જોકે, વર્ષ 2000 બાદ આ સંખ્યામાં સતત ઘટાડો થયો હતો અને માત્ર 27 મંડળો યાત્રામાં જોડાતા હતા.

હવે આ વખતે 32 મંડળો જોડાતા હોવાથી શહેરમાં ફરી ભવ્ય વિસર્જન યાત્રા જોવા મળશે.

વિસર્જન યાત્રા શુક્રવારે આઝાદ મેદાનથી શરૂ થશે. ત્યારબાદ અંબાજી મંદિર, ગોપી સિનેમા, લોટીયા ભાગોળ, કપાસિયા બજાર, ટાવર બજાર, ગામડી વડ, કરમસદ-આણંદ મનપા કચેરી સામે, ગોપાલ ચાર રસ્તા, જૂનું એસટી સ્ટેન્ડ, વેરાઈ માતા મંદિર અને મહારાણા પ્રતાપ સ્ટેચ્યુ થઈને યાત્રા પસાર થશે.

યાત્રાને ધ્યાનમાં રાખીને સ્ટેશન રોડ, જૂના રસ્તા અને ગોપી સિનેમા રોડ પર સવારે 7 વાગ્યાથી રાત્રે 11 વાગ્યા સુધી વાહનો માટે નો-એન્ટ્રી રહેશે.

આ ઉપરાંત ટાઉન હોલ ત્રણ રસ્તાથી ગોપી સિનેમા રોડ થઈ મહારાણા પ્રતાપ સ્ટેચ્યુ સુધી, બેઠક મંદિરથી ગામડી વડ, સ્ટેશન રોડ, મ્યુનિસિપલ દવાખાનાથી લક્ષ્મી ટોકીઝ અને લક્ષ્મી ટોકીઝથી વેનડોર ચાર રસ્તા સુધીના માર્ગો પર ડાયવર્ઝન કરવામાં આવશે.

આણંદ શહેર પોલીસ દ્વારા અમૂલ ડેરીથી મહારાણા પ્રતાપ સ્ટેચ્યુ સુધીના સમગ્ર રૂટ પર જરૂરી પોલીસ બંદોબસ્ત પણ ગોઠવવામાં આવશે.

જાહેરનામાના આદેશોનો ભંગ કરનાર વ્યક્તિ સામે ગુજરાત પોલીસ અધિનિયમની કલમ 131 હેઠળ શિક્ષાત્મક કાર્યવાહી કરવામાં આવશે.

હવે વાત કરીએ વાહનચાલકો માટેના વૈકલ્પિક માર્ગોની.

સામરખા ચોકડી તરફથી આવતા વાહનો મહેન્દ્ર શાહ હોસ્પિટલ અને ગુજરાતી ચોક થઈ જૂના દાદર તથા અમૂલ ડેરી રોડથી ગણેશ ચોકડી તરફ જઈ શકશે.

લાંભવેલ અને વિદ્યાનગર રોડ તરફથી આવતા વાહનો GEB ગ્રીડ ચોકડી, સરદાર બાગ પોલીસ ચોકી અને ભાલેજ ઓવરબ્રિજ થઈ સામરખા ચોકડી તરફ જઈ શકશે.

બોરસદ ચોકડી તરફથી આવતા વાહનો ગણેશ ચોકડી, અમૂલ ડેરી, જૂના દાદર અને ગુજરાતી ચોક થઈ મહેન્દ્ર શાહ હોસ્પિટલ તરફ જઈ શકશે.

જ્યારે નવા બસ સ્ટેશન તરફથી આવતા વાહનો પાયોનિયર હાઈસ્કૂલ ચોકડી થઈ મહેન્દ્ર શાહ હોસ્પિટલ રોડનો ઉપયોગ કરી શકશે.

આથી ગણેશ વિસર્જન યાત્રા દરમિયાન આણંદ શહેરમાં ટ્રાફિક વ્યવસ્થા જળવાઈ રહે તે માટે વાહનચાલકોને નક્કી કરાયેલા વૈકલ્પિક માર્ગોનો ઉપયોગ કરવા અને પોલીસના ટ્રાફિક સૂચનોનું પાલન કરવા અપીલ કરવામાં આવી છે.