આણંદ જિલ્લામાં યોજાનારી ઉમરેઠ વિધાનસભા પેટાચૂંટણીને ધ્યાનમાં રાખીને ગુજરાત રાજ્યના પોલીસ વડા ડો. કે. એલ. એન. રાવે જિલ્લા પોલીસ તંત્ર સાથે સુરક્ષા વ્યવસ્થાની મહત્વપૂર્ણ સમીક્ષા બેઠક યોજી હતી. આ મુલાકાત દરમિયાન તેમણે ચૂંટણી પ્રક્રિયા સંપૂર્ણપણે શાંતિપૂર્ણ અને નિષ્પક્ષ રીતે સંપન્ન થાય તે માટે કાયદો અને વ્યવસ્થાની સ્થિતિનું વિગતવાર મૂલ્યાંકન કરી જરૂરી સૂચનાઓ આપી હતી. જિલ્લા તેમજ કેન્દ્રીય દળોની તૈનાતી અંગે પણ વિસ્તૃત ચર્ચા કરવામાં આવી હતી.
બેઠક દરમિયાન સ્થાનિક પોલીસ, સેન્ટ્રલ આર્મ્ડ પોલીસ ફોર્સ (CAPF) અને સ્ટેટ રિઝર્વ પોલીસ ફોર્સ (SRPF) ના જવાનોની તૈનાતી યોજના પર ધ્યાન કેન્દ્રિત કરવામાં આવ્યું હતું. સાથે જ લાયસન્સવાળા હથિયારો જમા કરાવવાની પ્રક્રિયા અને અસામાજિક તત્વો વિરુદ્ધ હાથ ધરાયેલા પગલાંઓની પણ સમીક્ષા કરવામાં આવી હતી. ડો. રાવે ભારપૂર્વક જણાવ્યું હતું કે, મુક્ત, ન્યાયી અને પારદર્શક ચૂંટણી યોજવા માટે સુરક્ષિત વાતાવરણ પૂરું પાડવું પોલીસ તંત્રની પ્રથમ જવાબદારી છે.
ચૂંટણી આચારસંહિતાનો કડક અમલ થાય તે માટે તમામ ચેકપોસ્ટ પર સઘન તપાસ કરવા અને મતદારોમાં વિશ્વાસ વધે તે માટે ‘એરિયા ડોમિનેશન’ જેવી કામગીરી હાથ ધરવા સૂચના આપવામાં આવી હતી. સુરક્ષા વ્યવસ્થાને વધુ મજબૂત બનાવવા ડ્રોન દ્વારા નજર રાખવી અને પોલીસ કર્મચારીઓ માટે બોડી-વોર્ન કેમેરાનો ઉપયોગ કરવાની પણ સલાહ આપવામાં આવી હતી. ઈવીએમ સ્ટ્રોંગ રૂમ માટે બહુસ્તરીય સુરક્ષા પ્રોટોકોલનું પાલન કરવા ખાસ ભાર મૂકવામાં આવ્યો હતો.
આ ઉપરાંત સોશિયલ મીડિયા પર અફવાઓ ફેલાવતા તત્વો સામે સાયબર સેલને સતત સક્રિય રાખવા અને ચૂંટણી પ્રક્રિયામાં ખલેલ પહોંચાડતા કન્ટેન્ટ સામે તાત્કાલિક કાર્યવાહી કરવા આદેશ આપવામાં આવ્યો હતો. સંવેદનશીલ મતદાન મથકો પર વિશેષ દેખરેખ રાખવા તથા અધિકારીઓને સ્થળ પર જઈ વ્યવસ્થા ચકાસવા સૂચનાઓ આપવામાં આવી હતી. રાજ્ય પોલીસ વડાએ મતદારોને કોઈપણ ભય વગર પોતાના મતાધિકારનો ઉપયોગ કરવા અપીલ કરી હતી.
