સુરતના ક્રિકેટ વહીવટને લઈને સુરત ડિસ્ટ્રિક્ટ ક્રિકેટ એસોસિએશન (SDCA)ની વાર્ષિક સામાન્ય સભા દરમિયાન અનેક મુદ્દાઓ પર ચર્ચા અને હોબાળો થયો હતો. 200થી વધુ સભ્યોની હાજરીમાં યોજાયેલી AGMમાં મહિલા ખેલાડીઓની સુરક્ષા, પસંદગી પ્રક્રિયામાં પારદર્શિતા, નાણાકીય વ્યવહારો અને હિતોના ટકરાવ સહિતના મુદ્દાઓ ઉઠાવવામાં આવ્યા હતા.
બેઠક દરમિયાન એક સભ્ય દ્વારા મહિલા ખેલાડી સાથે કોચ દ્વારા કરવામાં આવેલી કથિત વાતચીતનો ગંભીર આક્ષેપ કરવામાં આવ્યો હતો. બીજી તરફ, SDCAના સેક્રેટરી ડૉ. નૈમેષ દેસાઈએ આક્ષેપોને પુરાવા વિના કરવામાં આવેલા દાવા ગણાવી તમામ બાબતોની તપાસ કરવાની ખાતરી આપી છે.
મહિલા ખેલાડીની પસંદગી અંગે ગંભીર આક્ષેપ
AGM દરમિયાન SDCAના સભ્ય પ્રતીક શાહે આક્ષેપ કર્યો હતો કે ભૂતકાળમાં એક કોચે મહિલા ખેલાડીને ટીમમાં પસંદગી માટે રાત્રે ચેટિંગ કરવાની માગણી કરી હતી.
પ્રતીક શાહના જણાવ્યા અનુસાર, આ મામલે તેમની પાસે કેટલાક પુરાવા અને ફોન રેકોર્ડિંગ્સ પણ ઉપલબ્ધ છે. તેમણે યોગ્ય તપાસ માટે આ સામગ્રી પોલીસ સમક્ષ રજૂ કરવાની વાત કરી હતી.
જોકે, SDCA સેક્રેટરી ડૉ. નૈમેષ દેસાઈએ જણાવ્યું હતું કે AGM પહેલાં આ પ્રકારની કોઈ સત્તાવાર ફરિયાદ સંસ્થા સુધી પહોંચી નહોતી. તેમણે સ્પષ્ટ કર્યું કે મહિલા ખેલાડીઓની સુરક્ષા અંગે એસોસિએશનની ઝીરો ટોલરન્સ નીતિ છે.
તેમના જણાવ્યા મુજબ, સંસ્થામાં મહિલા કોચ પણ કાર્યરત છે અને ચાઇલ્ડ પ્રોટેક્શન પોલિસી હેઠળ કામગીરી કરવામાં આવે છે. જો કોઈ નક્કર પુરાવા મળશે તો કાયદેસરની કાર્યવાહી કરવામાં આવશે.
ISPLના વ્યવહારો અને ટેન્ડરિંગ અંગે સવાલો
AGMમાં ક્રિકેટ એસોસિએશનના નાણાકીય વ્યવહારોને લઈને પણ સવાલો ઉઠાવવામાં આવ્યા હતા.
પ્રતીક શાહે આક્ષેપ કર્યો હતો કે ઓડિટ રિપોર્ટમાં ટેન્ડરિંગ પ્રક્રિયા અંગે ગંભીર નોંધ કરવામાં આવી છે. તેમણે એવો પણ દાવો કર્યો કે ISPL સાથે ઔપચારિક કોન્ટ્રાક્ટ અંગે પ્રશ્નો છે અને કેટલાક વ્યવહારો સેક્રેટરીના અંગત ઈ-મેઈલ મારફતે કરવામાં આવ્યા હતા.
તેમણે આશરે ₹5 કરોડની માગણી સામે ₹2.5 કરોડની રકમ પ્રાપ્ત થઈ હોવાનો મુદ્દો પણ ઉઠાવ્યો હતો.
જોકે, SDCA સેક્રેટરીએ આ તમામ આક્ષેપોને નકારી કાઢ્યા હતા. તેમનું કહેવું છે કે ઈ-મેઈલ મારફતે થયેલા વ્યવહારો મેનેજિંગ કમિટી દ્વારા મંજૂર કરવામાં આવ્યા હતા અને ગ્રાઉન્ડ માટે નક્કી થયેલી ₹2.5 કરોડની રકમ ઉપરાંત GST પણ એસોસિએશનના બેંક ખાતામાં જમા કરવામાં આવ્યો છે.
તેમણે જણાવ્યું કે આ નાણાકીય હિસાબ AGMમાં રજૂ થયા બાદ મંજૂર કરવામાં આવ્યા છે.
કોચ અને સિલેક્ટરોની ખાનગી એકેડેમી અંગે પણ ચર્ચા
સભા દરમિયાન કોચ, સિલેક્ટર અને એસોસિએશન સાથે સંકળાયેલા લોકોની ખાનગી ક્રિકેટ એકેડેમી અંગે પણ સવાલો ઉઠાવવામાં આવ્યા હતા.
પ્રતીક શાહે દાવો કર્યો હતો કે કેટલીક વ્યક્તિઓ એક તરફ એસોસિએશનની પસંદગી પ્રક્રિયામાં મહત્વની ભૂમિકા ભજવે છે અને બીજી તરફ ખાનગી એકેડેમી ચલાવે છે. તેમના મતે આ સ્થિતિ હિતોના ટકરાવનો પ્રશ્ન ઊભો કરી શકે છે.
જોકે, ડૉ. નૈમેષ દેસાઈએ કોચ અને સિલેક્ટરો અંગેના આક્ષેપોને નકારી કાઢ્યા હતા અને તમામ નિયુક્તિઓ નિયમો અનુસાર કરવામાં આવી હોવાનો દાવો કર્યો હતો.
ખેલાડીઓની ઉંમર અને જન્મ પ્રમાણપત્રનો મુદ્દો
AGMમાં ખેલાડીઓની ઉંમર ચકાસણીને લઈને પણ ચર્ચા થઈ હતી. એક ખેલાડીના અલગ-અલગ જન્મતારીખ ધરાવતા દસ્તાવેજોનો મુદ્દો સભામાં રજૂ કરવામાં આવ્યો હતો.
પ્રતીક શાહે દાવો કર્યો હતો કે બહારથી આવતા ડોમિસાઇલ વગરના અને ઓવરએજ ખેલાડીઓના કારણે સ્થાનિક પ્રતિભાશાળી ખેલાડીઓને નુકસાન થઈ રહ્યું છે.
તેમણે સુરતમાં મોટી સંખ્યામાં ક્રિકેટ એકેડેમીઓ અને હજારો યુવાનો તાલીમ લેતા હોવાનો ઉલ્લેખ કરીને સ્થાનિક ખેલાડીઓને વધુ તક આપવાની માગ કરી હતી.
SDCA સેક્રેટરીના જણાવ્યા મુજબ, સંબંધિત ખેલાડીના દસ્તાવેજો ગુજરાત ક્રિકેટ એસોસિએશન (GCA)ને મોકલવામાં આવ્યા હતા અને બોન ટેસ્ટ પાસ થયા બાદ જ મંજૂરી આપવામાં આવી હતી.
પસંદગી પ્રક્રિયામાં વધુ પારદર્શિતાની માગ
સભ્ય પ્રતીક શાહે ક્રિકેટ ટ્રાયલ્સમાં પારદર્શિતા વધારવા માટે ટ્રાયલ મેચનું સ્કોરિંગ ફરજિયાતપણે ઓનલાઈન કરવાની માગ કરી હતી.
તેમના મતે જો ટ્રાયલના સ્કોર, પ્રદર્શન અને પસંદગી પ્રક્રિયાની વિગતો ઓનલાઈન ઉપલબ્ધ હોય તો ખેલાડીઓ અને વાલીઓમાં પારદર્શિતા અંગેનો વિશ્વાસ વધશે.
SDCAએ આક્ષેપો ફગાવ્યા
SDCA સેક્રેટરી ડૉ. નૈમેષ દેસાઈએ AGMમાં ઉઠાવવામાં આવેલા વિવિધ આક્ષેપોને પાયાવિહોણા ગણાવ્યા હતા.
મહિલા સુરક્ષા મુદ્દે તેમણે ફરીથી સ્પષ્ટ કર્યું કે કોઈપણ પ્રકારની ફરિયાદ અથવા પુરાવા મળશે તો કડક કાર્યવાહી કરવામાં આવશે. નાણાકીય વ્યવહારો અને ખેલાડીઓની પસંદગી અંગે પણ તેમણે એસોસિએશન દ્વારા નિયમોનું પાલન કરવામાં આવતું હોવાનો દાવો કર્યો હતો.
હવે AGMમાં ઉઠાવવામાં આવેલા આક્ષેપો અંગે જો કોઈ પુરાવા સત્તાવાર રીતે રજૂ કરવામાં આવે છે તો તેની તપાસ બાદ જ સમગ્ર મામલાની હકીકત વધુ સ્પષ્ટ થઈ શકશે.
નોંધ: આ અહેવાલમાં દર્શાવાયેલા આક્ષેપો સભામાં કરવામાં આવેલા દાવાઓ પર આધારિત છે. સંબંધિત પક્ષ દ્વારા કેટલાક આક્ષેપોનું ખંડન કરવામાં આવ્યું છે.