રશિયા અને અમેરિકન કંપનીઓ વચ્ચેનો તણાવ સતત વધી રહ્યો છે. તાજેતરના કિસ્સામાં, WhatsAppએ જણાવ્યું છે કે રશિયાએ તેની સર્વિસ પર સંપૂર્ણ પ્રતિબંધ (Complete Ban) મૂકવાનો પ્રયાસ કર્યો છે. કંપનીના પ્રવક્તાએ આ વાતની પુષ્ટિ કરતા કહ્યું કે, અમે યુઝર્સને કનેક્ટેડ રાખવા માટે તમામ શક્ય પ્રયાસો કરીશું. ઉલ્લેખનીય છે કે WhatsAppની કેટલીક સેવાઓ રશિયામાં પહેલાથી જ પ્રતિબંધિત છે અને હવે તાજેતરના અહેવાલોમાં કહેવામાં આવી રહ્યું છે કે તેને સંપૂર્ણપણે બ્લોક કરી દેવામાં આવ્યું છે. આ પહેલા સમાચાર આવ્યા હતા કે રશિયાના કોમ્યુનિકેશન વોચડોગ Roskomnadzor એ WhatsAppને ઓનલાઇન ડિરેક્ટરીમાંથી હટાવી દીધું છે. અહીં અંદાજે 10 લાખ યુઝર્સ વોટ્સએપનો ઉપયોગ કરી રહ્યા છે.
રશિયા કેમ આટલું કડક વલણ અપનાવી રહ્યું છે?
યુક્રેન સાથે યુદ્ધ શરૂ થયા બાદથી રશિયા અમેરિકન કંપનીઓ વિરુદ્ધ કડક કાર્યવાહી કરી રહ્યું છે. આ ઉપરાંત, ત્યાંની સરકાર ઈચ્છે છે કે તેના વધુને વધુ નાગરિકો સરકારી એપ MAX નો ઉપયોગ કરે. જોકે, ટીકાકારોનું કહેવું છે કે સરકાર આ એપ દ્વારા નાગરિકોને ટ્રેક કરવા માંગે છે.
રશિયામાં WhatsAppના આ ફીચર્સ પહેલાથી જ બ્લોક છે
રશિયાએ ગયા વર્ષે WhatsApp અને Telegram ની કોલિંગ સેવા પર પ્રતિબંધ મૂક્યો હતો. રશિયાનું કહેવું છે કે આ બંને પ્લેટફોર્મ ફ્રોડ અને આતંકવાદના કેસમાં કાયદાકીય એજન્સીઓ સાથે માહિતી શેર કરી રહ્યા નથી. તેવી જ રીતે, રશિયાએ ડિસેમ્બરમાં એપલની ફેસટાઇમ (FaceTime) અને સ્નેપચેટ (Snapchat) પર પણ પ્રતિબંધ મૂક્યો હતો. આદેશમાં જણાવાયું હતું કે આ એપ્સનો ઉપયોગ છેતરપિંડી કરવા અને આતંકવાદી ગતિવિધિઓના આયોજન તેમજ તેને અંજામ આપવા માટે કરવામાં આવી રહ્યો હતો.
પ્રતિબંધ હટાવવા અંગે સરકાર શું કહી રહી છે?
રશિયન સરકારનું કહેવું છે કે જો મેટા (Meta) તેના નિયમોનું પાલન કરશે તો પ્રતિબંધ હટાવવા પર વિચાર થઈ શકે છે. ક્રેમલિનના પ્રવક્તાને જ્યારે પૂછવામાં આવ્યું કે શું WhatsApp પરથી પ્રતિબંધ હટાવવામાં આવશે, ત્યારે તેમણે કહ્યું કે આ કાયદો માનવાનો પ્રશ્ન છે. જો મેટા કાયદાનું પાલન કરે અને રશિયન અધિકારીઓ સાથે વાતચીત શરૂ કરે તો કોઈ સમજૂતી થઈ શકે છે. બીજી તરફ, જો મેટા રશિયાના કાયદા માનવા તૈયાર નહીં થાય, તો WhatsApp પરથી પ્રતિબંધ હટવાની કોઈ શક્યતા નથી.
