ગુજરાતમાં સ્થાનિક સ્વરાજ્યની 2026ની ચૂંટણીમાં ભાજપે તમામ મહાનગરપાલિકાઓમાં મોટી જીત નોંધાવી છે. જીત બાદ હવે તમામની નજર મેયર અને સ્ટેન્ડિંગ કમિટીના ચેરમેન જેવા મહત્વના પદો પર હતી. જોકે તમામ મનપાના મેયરના નામ એકસાથે જાહેર ન થતા રાજકીય વર્તુળોમાં ચર્ચાઓ તેજ બની હતી. આ પાછળ ચોક્કસ વહીવટી નિયમો અને ભાજપની આંતરિક રાજકીય પ્રક્રિયા જવાબદાર હોવાનું સામે આવ્યું છે.
અલગ-અલગ દિવસે યોજાઈ રહી છે પહેલી સામાન્ય સભા
સ્થાનિક સ્વરાજ્યના નિયમો મુજબ કોઈપણ મહાનગરપાલિકાના મેયરની સત્તાવાર જાહેરાત તે મનપાની પહેલી સામાન્ય સભા એટલે કે જનરલ બોર્ડ મીટિંગમાં જ થઈ શકે છે. તમામ મનપાની સામાન્ય સભા એકસાથે યોજાતી નથી. અમદાવાદ, જામનગર અને મહેસાણા જેવી મનપાઓમાં 26 મે 2026ના રોજ તબક્કાવાર બોર્ડ બેઠક યોજાઈ હતી અને ત્યાં પદાધિકારીઓના નામ જાહેર થઈ ગયા છે. જ્યારે બાકીની મનપાઓમાં આગામી દિવસોમાં સામાન્ય સભા યોજાશે અને ત્યારબાદ મેયરના નામ જાહેર થશે.
ભાજપમાં દાવેદારોની લાંબી યાદીથી ખેંચતાણ
આ વખતે ભાજપે તમામ 15 મનપામાં બહુમતી મેળવતા મેયર અને સ્ટેન્ડિંગ કમિટીના ચેરમેન પદ માટે દાવેદારોની સંખ્યા વધી ગઈ છે. સુરત, વડોદરા અને સૌરાષ્ટ્રના વિસ્તારોમાં જુદા-જુદા જૂથો અને સ્થાનિક નેતાઓ વચ્ચે સર્વસંમતિ સાધવામાં પક્ષને સમય લાગ્યો છે. સાથે જ પ્રાદેશિક અને જ્ઞાતિગત સમીકરણોને ધ્યાનમાં રાખીને નામ નક્કી કરવાની પ્રક્રિયા પણ લાંબી ચાલી છે.
હાઈ કમાન્ડની મંજૂરીમાં થયો વિલંબ
સ્થાનિક સ્તરે નિરીક્ષકો દ્વારા લેવાયેલી સેન્સ પ્રક્રિયા બાદ નામોની યાદી પ્રદેશ ભાજપ પાર્લામેન્ટરી બોર્ડ સમક્ષ મોકલવામાં આવી હતી. ત્યારબાદ હાઈ કમાન્ડની આખરી મંજૂરી મેળવવામાં સમય લાગતા અગાઉની ચૂંટણીઓની સરખામણીએ આ વખતે 15થી 20 દિવસ જેટલો વિલંબ નોંધાયો છે.
નવી મનપાઓમાં વહીવટી પ્રક્રિયા પણ કારણભૂત
ગુજરાતમાં આ વર્ષે 9 નવી મહાનગરપાલિકાઓની પ્રથમ ચૂંટણી યોજાઈ છે. મહેસાણા, મોરબી, આણંદ, નડિયાદ, ગાંધીધામ, પોરબંદર, સુરેન્દ્રનગર, નવસારી અને વાપી જેવી નવી મનપાઓમાં પ્રથમવાર બોર્ડનું ગઠન થતું હોવાથી વહીવટી પ્રક્રિયા પૂર્ણ કરવામાં વધુ સમય લાગી રહ્યો છે. સાથે જ મેયર પદના રોટેશન અને અનામત વ્યવસ્થા નક્કી કરવાની પ્રક્રિયા પણ ચાલી રહી છે.
તબક્કાવાર જાહેર થશે તમામ નામો
સૂત્રોના જણાવ્યા મુજબ ભાજપ સંગઠન દ્વારા મોટાભાગના નામો ફાઈનલ કરી દેવામાં આવ્યા છે અને મેન્ડેટ પણ તૈયાર છે. જોકે જે-તે મનપાની સામાન્ય સભા અલગ-અલગ તારીખે યોજાતી હોવાથી તમામ મેયરના નામ તબક્કાવાર રીતે જ જાહેર કરવામાં આવી રહ્યા છે.
