ગુજરાત હાઈકોર્ટ પહોંચ્યો સુરતનો પિતા, અઢી વર્ષની દીકરીની નાગરિકતાને લઈને ચિંતા
સુરતમાં રહેતા એક પિતાએ પોતાની અઢી વર્ષની દીકરીની ભારતીય નાગરિકતા અંગે ચિંતા વ્યક્ત કરતાં ગુજરાત હાઈકોર્ટમાં અરજી કરી છે. કારણ છે તેમની બેલ્જિયન પત્ની સાથેનો વૈવાહિક વિવાદ.
મળતી માહિતી મુજબ, પતિ-પત્ની 2021માં દિલ્હીમાં મળ્યા હતા અને ત્યારબાદ લગ્ન કર્યા હતા. બંને ઇસ્કોનના ભક્ત હોવાનું પણ કોર્ટમાં જણાવાયું છે. 2023માં પશ્ચિમ બંગાળમાં તેમની દીકરીનો જન્મ થયો હતો અને ત્યારબાદ પરિવાર સુરત આવીને રહેવા લાગ્યો હતો.
જોકે, વૈવાહિક વિવાદ બાદ પત્ની દીકરીને લઈને બેલ્જિયમ પરત ફરી હતી અને ત્યાં કાનૂની કાર્યવાહી શરૂ કરવામાં આવી હતી.
હવે પિતાને આશંકા છે કે બેલ્જિયમમાં ચાલી રહેલી આ કાર્યવાહી 29 સપ્ટેમ્બરે પૂર્ણ થયા બાદ તેમની દીકરીને બેલ્જિયન નાગરિકતા મળી શકે છે, જેના કારણે તેની ભારતીય નાગરિકતા અંગે કાનૂની સ્થિતિ ઊભી થઈ શકે છે.
અરજદારના વકીલે કોર્ટમાં રજૂઆત કરી કે જો આ મામલે સમયસર હસ્તક્ષેપ નહીં થાય તો બાળક દેશવિહીન થવાની સ્થિતિમાં આવી શકે છે.
પિતાએ આ મામલે વિદેશ મંત્રાલયનો પણ સંપર્ક કર્યો હતો. તેમણે સિટીઝનશિપ એક્ટના નિયમ 40 હેઠળ તપાસ શરૂ કરવાની માંગ કરી હતી. તેમના જણાવ્યા મુજબ, 5 ઓગસ્ટે રજૂઆત કરવા છતાં કેન્દ્ર સરકાર તરફથી હજુ સુધી કોઈ કાર્યવાહી થઈ નથી.
હવે પિતાની માંગ છે કે તેમની દીકરીએ જન્મથી મેળવેલી ભારતીય નાગરિકતાનું રક્ષણ કરવામાં આવે અને તે હજુ ભારતીય નાગરિક છે કે નહીં તે અંગે જરૂરી કાર્યવાહી કરવામાં આવે.
આ મામલે ગુજરાત હાઈકોર્ટે અરજદારના વકીલ અને કેન્દ્ર સરકારના કાઉન્સેલને આ અરજી માટે યોગ્ય સત્તાધિકારી કોણ છે તે અંગે સ્પષ્ટતા કરવા કહ્યું છે.
હાઈકોર્ટે વધુ સુનાવણી ગુરુવાર સુધી મુલતવી રાખી છે.