આણંદ જિલ્લાના બોરીયાવી ખાતે યોજાનારા ‘માં શક્તિ ગરબા’ મહોત્સવને ધ્યાનમાં રાખીને ટ્રાફિક વ્યવસ્થામાં ફેરફાર કરવામાં આવ્યો છે. 11થી 20 ઓક્ટોબર, 2026 દરમિયાન મહોત્સવના સ્થળે ટ્રાફિક જામની સ્થિતિ ઊભી ન થાય તે માટે અધિક જિલ્લા મેજિસ્ટ્રેટ રાહુલ ગમારા દ્વારા ભારે વાહનો માટે ટ્રાફિક ડાયવર્ઝન અંગેનું જાહેરનામું બહાર પાડવામાં આવ્યું છે.
જાહેરનામા મુજબ, આ સમયગાળા દરમિયાન દરરોજ રાત્રે 9 વાગ્યાથી બીજા દિવસે સવારે 6 વાગ્યા સુધી આણંદ-બોરીયાવી-નડિયાદ માર્ગ પર લાભંવેલ તરફના રસ્તે ભારે વાહનોની અવરજવર બંધ રહેશે. આ પ્રતિબંધ ટ્રક, ડમ્પર, ટ્રેલર સહિતનાં ભારે વાહનોને લાગુ પડશે.
ભારે વાહનો માટે વૈકલ્પિક માર્ગો
આણંદથી બોરીયાવી અને નડિયાદ તરફ જતાં ભારે વાહનો માટે બે વૈકલ્પિક માર્ગો નક્કી કરવામાં આવ્યા છે. વાહનચાલકો ઇન્દિરા સર્કલથી સામરખા ચોકડી થઈને અથવા સંકેત સર્કલથી બાકરોલ અને વડતાલ થઈને પોતાના ગંતવ્ય સુધી પહોંચી શકશે.
તેવી જ રીતે, નડિયાદ અને બોરીયાવીથી આણંદ તરફ આવતા ભારે વાહનચાલકોએ પણ આ જ વૈકલ્પિક માર્ગોનો ઉપયોગ કરવાનો રહેશે.
કયા વાહનોને પ્રતિબંધમાંથી મુક્તિ?
જાહેરનામા મુજબ, સરકારી વાહનો, એમ્બ્યુલન્સ અને ફાયરબ્રિગેડનાં વાહનોને આ ટ્રાફિક નિયંત્રણમાંથી મુક્તિ આપવામાં આવી છે. નિર્ધારિત સમય દરમિયાન નિયમોનું ઉલ્લંઘન કરનારા વાહનચાલકો સામે કાયદેસરની કાર્યવાહી કરવામાં આવશે.
‘માં શક્તિ ગરબા’ મહોત્સવ દરમિયાન નાગરિકોને ટ્રાફિકની સમસ્યાનો સામનો ન કરવો પડે અને વાહનવ્યવસ્થા સુચારુ રહે તે હેતુથી આ નિર્ણય લેવામાં આવ્યો છે. તેથી ભારે વાહનચાલકોએ મુસાફરીનું આયોજન કરતી વખતે જાહેર કરાયેલા સમય અને વૈકલ્પિક માર્ગોની નોંધ લેવા અપીલ કરવામાં આવે છે.