ભારતમાં ડિજિટલ પેમેન્ટની દુનિયામાં વધુ એક મોટો વિકલ્પ ઉમેરાયો છે. ટેક કંપની Appleએ દેશમાં પોતાની Apple Pay સર્વિસ શરૂ કરી છે. આ સાથે iPhone અને Apple Watch યુઝર્સ માટે કાર્ડલેસ અને કોન્ટેક્ટલેસ પેમેન્ટની સુવિધા ઉપલબ્ધ બની છે.
શરૂઆતના તબક્કામાં Axis Bank Apple Payનું પ્રથમ બેંકિંગ પાર્ટનર બન્યું છે. હાલમાં Axis Bankના પાત્ર Visa અને Mastercard ક્રેડિટ કાર્ડ્સને Apple Payમાં સપોર્ટ આપવામાં આવી રહ્યો છે. યુઝર્સ પોતાના કાર્ડને iPhoneની Apple Wallet એપમાં ઉમેરીને પેમેન્ટ કરી શકશે.
Apple Payથી પેમેન્ટ કેવી રીતે થશે?
સ્ટોર પર પેમેન્ટ કરતી વખતે iPhone યુઝર્સે સાઇડ બટન અથવા હોમ બટનને બે વખત ક્લિક કરવાનું રહેશે. ત્યારબાદ Face ID, Touch ID અથવા ડિવાઇસ પાસકોડથી ઓથેન્ટિકેશન કરીને iPhoneને કોન્ટેક્ટલેસ પેમેન્ટ ટર્મિનલ પાસે લઈ જવાનો રહેશે.
Apple Watch યુઝર્સે સાઇડ બટનને બે વખત દબાવીને ઘડિયાળને પેમેન્ટ રીડરની નજીક રાખવાની રહેશે.
ઓનલાઈન શોપિંગ માટે પણ સપોર્ટેડ એપ્સ અને વેબસાઇટ્સ પર Apple Payનો ઉપયોગ કરી શકાશે. ખાસ વાત એ છે કે પેમેન્ટ દરમિયાન દરેક વખતે કાર્ડ નંબર, PIN અથવા OTP નાખવાની જરૂર રહેશે નહીં.
કયા સ્ટોર્સ અને એપ્સ પર મળશે સુવિધા?
ભારતમાં લોન્ચ સાથે Apple Pay અનેક જાણીતા મર્ચન્ટ્સ અને ડિજિટલ પ્લેટફોર્મ્સ પર ઉપલબ્ધ છે. તેમાં Blinkit, Croma, Interflora, MakeMyTrip, ixigo, Tata 1mg, Zomato, Reliance Brands અને Appleના સ્ટોર્સ સહિતના નામ સામેલ છે.
Appleએ પેમેન્ટ ઇકોસિસ્ટમ માટે Cashfree, Juspay, Mswipe, Paytm, PayU, Pine Labs, Razorpay અને Worldline જેવા પેમેન્ટ સર્વિસ પ્રોવાઇડર્સ સાથે પણ ભાગીદારી કરી છે.
Apple Walletમાં Axis Bank કાર્ડ કેવી રીતે ઉમેરવું?
પાત્ર Axis Bank Visa અથવા Mastercard ક્રેડિટ કાર્ડધારકો પોતાના કાર્ડને Apple Walletમાં ઉમેરી શકે છે. તેના માટે Wallet એપ ખોલીને ‘+’ એટલે કે Add Card વિકલ્પ પસંદ કરવાનો રહેશે અને સ્ક્રીન પર આપેલા સ્ટેપ્સ અનુસરવાના રહેશે.
કાર્ડ Apple Payમાં ઉમેર્યા બાદ પણ કાર્ડ સાથે મળતા પાત્ર રિવોર્ડ્સ અને અન્ય લાભો ચાલુ રહેશે.
કાર્ડની માહિતી કેટલી સુરક્ષિત?
Apple અનુસાર, Apple Payમાં યુઝરના અસલી કાર્ડ નંબરને મર્ચન્ટ સાથે શેર કરવામાં આવતો નથી. કાર્ડની માહિતીની જગ્યાએ Device Account Numberનો ઉપયોગ થાય છે.
આ નંબર ડિવાઇસના Secure Element નામના અલગ સુરક્ષિત હાર્ડવેરમાં એન્ક્રિપ્ટેડ સ્વરૂપે સ્ટોર થાય છે. એટલે પેમેન્ટ વખતે મર્ચન્ટને યુઝરના અસલી કાર્ડ નંબરની માહિતી મળતી નથી.
કયા iPhone અને Apple Watchમાં ચાલશે?
Apple Payનો ઉપયોગ કરવા માટે iOS 18 અથવા તેનાથી નવા વર્ઝનવાળો iPhone XR અથવા ત્યાર પછીનો મોડેલ જરૂરી છે.
Apple Watch માટે watchOS 11 અથવા તેનાથી નવા વર્ઝનવાળી Apple Watch Series 6 અથવા ત્યાર પછીની સિરીઝ જરૂરી છે. સાથે તેને iPhone XR અથવા નવા iPhone સાથે કનેક્ટેડ હોવું જોઈએ.
Tokenization શું છે?
Apple Payની સુરક્ષા વ્યવસ્થામાં Tokenization મહત્વની ભૂમિકા ભજવે છે. કાર્ડ ઉમેર્યા બાદ 16 અંકનો અસલી કાર્ડ નંબર પેમેન્ટ માટે સીધો ઉપયોગ થતો નથી. તેના બદલે એક અલગ યુનિક કોડ એટલે કે ટોકન/Device Account Numberનો ઉપયોગ થાય છે.
આ માહિતી Secure Elementમાં સુરક્ષિત રીતે રાખવામાં આવે છે અને ટ્રાન્ઝેક્શન દરમિયાન આ ટોકનનો ઉપયોગ થાય છે. આ રીતે પેમેન્ટ પ્રક્રિયામાં અસલી કાર્ડની વિગતો મર્ચન્ટ સુધી પહોંચતી નથી.