ભારતીય ક્રિકેટમાં ખેલાડીઓની ઈજા અને તેમની ઉપલબ્ધતાને લઈને વધી રહેલી ચિંતાઓ વચ્ચે BCCIએ મહત્વનો નિર્ણય લીધો છે. હવે સેન્ટર ઓફ એક્સલન્સ (CoE)ના પ્રમુખ અને હેડ ઓફ ક્રિકેટ VVS લક્ષ્મણ સિનિયર પુરુષ પસંદગી સમિતિની દરેક બેઠકમાં હાજર રહેશે.
BCCI સેક્રેટરી દેવજીત સૈકિયાએ મંગળવારે મુંબઈમાં યોજાયેલી રિવ્યૂ મિટિંગ બાદ આ નિર્ણયની જાણકારી આપી હતી. તેમના જણાવ્યા અનુસાર, પસંદગીકારો અને CoE વચ્ચે કોઈ પ્રકારનો કમ્યુનિકેશન ગેપ ન રહે તે માટે લક્ષ્મણને દરેક સિલેક્શન મિટિંગમાં સામેલ કરવાનો નિર્ણય લેવાયો છે.
ઈજા અને ફિટનેસ અંગે પસંદગીકારોને મળશે અપડેટ
છેલ્લા કેટલાક મહિનામાં અનેક વખત એવું જોવા મળ્યું છે કે ખેલાડીની ટીમમાં પસંદગી થયા બાદ મેચ પહેલા તેની ફિટનેસને લઈને સમસ્યા સામે આવી હોય. આવી સ્થિતિમાં પસંદગી પ્રક્રિયા અને ખેલાડીઓની વાસ્તવિક ઉપલબ્ધતા વચ્ચે વધુ સારો તાલમેલ રહે તે માટે આ નિર્ણય મહત્વપૂર્ણ માનવામાં આવી રહ્યો છે.
લક્ષ્મણ CoEની જવાબદારી સંભાળતા હોવાથી ભારતીય ખેલાડીઓની ઈજા, ફિટનેસ અને રિહેબિલિટેશન અંગેની માહિતી તેમની પાસે રહે છે. હવે તેઓ આ માહિતી સીધી પસંદગીકારો સમક્ષ રજૂ કરી શકશે.
લક્ષ્મણ તાજેતરમાં ગુવાહાટીમાં યોજાયેલી T20 અને ઈન્ડિયા-A ટીમની પસંદગી બેઠકમાં પણ હાજર રહ્યા હતા.
ખેલાડીઓની ઈજા BCCI માટે ચિંતાનો મુદ્દો
ભારતીય ટીમમાં સતત ખેલાડીઓ ઈજાગ્રસ્ત થવાના કારણે ટીમ કોમ્બિનેશન પર પણ તેની અસર પડી રહી છે. વેસ્ટ ઇન્ડીઝ સામેની ત્રીજી વન-ડે બાદ કેપ્ટન શુભમન ગિલે પણ ઈજાઓને લઈને ચિંતા વ્યક્ત કરી હતી.
ગિલના જણાવ્યા અનુસાર, ઈજા અને વ્યસ્ત ક્રિકેટ શેડ્યૂલને કારણે ટીમને પોતાની પસંદગીની બોલિંગ લાઇન-અપ સાથે સતત રમવાની તક મળી રહી નથી.
2027ના વન-ડે વર્લ્ડ કપને ધ્યાનમાં રાખીને ટીમ મેનેજમેન્ટ હવે સંભવિત ખેલાડીઓ અને કોમ્બિનેશનને વધુ તક આપવા માંગે છે. જોકે વર્લ્ડ કપની તૈયારી માટે હવે વધુ પ્રયોગો કરવાનો સમય મર્યાદિત છે.
પસંદગી અને રિહેબ વચ્ચે તાલમેલ વધારવાનો પ્રયાસ
લક્ષ્મણની નિયમિત હાજરીથી CoEમાં ચાલી રહેલા ખેલાડીઓના રિહેબ અને ફિટનેસ પ્રોગ્રામ અંગેની માહિતી પસંદગીકારોને સીધી મળી શકશે. જેના કારણે ઈજાગ્રસ્ત ખેલાડી ક્યારે ટીમમાં પરત ફરવા માટે ઉપલબ્ધ થઈ શકે છે તે અંગે વધુ ચોક્કસ નિર્ણય લઈ શકાશે.
આ પગલાનો મુખ્ય હેતુ ઈન્જરી મેનેજમેન્ટ, ફિટનેસ અને ટીમ સિલેક્શન વચ્ચે વધુ સારો કો-ઓર્ડિનેશન સ્થાપિત કરવાનો છે.
BCCIએ પસંદગી સમિતિના એક સભ્ય માટે અરજીઓ મંગાવી
આ સાથે BCCIએ સિનિયર પુરુષ પસંદગી સમિતિમાં એક નવા સભ્યની નિમણૂક માટે અરજીઓ પણ મંગાવી છે. પસંદ થનાર સભ્ય ટેસ્ટ, ODI અને T20 સહિત તમામ ફોર્મેટમાં ભારતીય સિનિયર પુરુષ ટીમની પસંદગી પ્રક્રિયાનો ભાગ બનશે.
પસંદગીકારની જવાબદારીઓમાં ખેલાડીઓના સ્થાનિક અને આંતરરાષ્ટ્રીય પ્રદર્શનનું મૂલ્યાંકન, નવી પ્રતિભાઓની ઓળખ, મજબૂત બેન્ચ સ્ટ્રેન્થ તૈયાર કરવી અને જરૂરી મેચોમાં પ્રવાસ કરવાનો સમાવેશ થાય છે.
આ ઉપરાંત પસંદગી સમિતિએ ટીમની બેઠકોમાં ભાગ લેવો પડશે અને ટીમના પ્રદર્શન અંગે BCCIની એપેક્સ કાઉન્સિલને ત્રિમાસિક રિપોર્ટ આપવાનો રહેશે. ટીમના કેપ્ટનની નિમણૂક અને ટીમ પસંદગી અંગે મીડિયાને માહિતી આપવાની જવાબદારી પણ સમિતિની રહેશે.
કોણ કરી શકે અરજી?
BCCIના માપદંડ મુજબ, ઉમેદવારે ઓછામાં ઓછા 7 ટેસ્ટ અથવા 30 ફર્સ્ટ ક્લાસ મેચ, અથવા 10 ODI અને 20 ફર્સ્ટ ક્લાસ મેચ રમેલી હોવી જરૂરી છે.
ઉમેદવારે આંતરરાષ્ટ્રીય ક્રિકેટમાંથી નિવૃત્તિ લીધાને ઓછામાં ઓછા 5 વર્ષ પૂર્ણ થયેલા હોવા જોઈએ. સાથે જ BCCIની કોઈપણ ક્રિકેટ સમિતિમાં કુલ 5 વર્ષનો કાર્યકાળ પૂર્ણ કરી ચૂકેલી વ્યક્તિ આ પદ માટે પાત્ર ગણાશે નહીં.
આ નિર્ણય બાદ હવે ભારતીય ટીમની પસંદગી પ્રક્રિયામાં ફિટનેસ અને ઈન્જરી અપડેટ્સને વધુ મહત્વ મળશે, જેથી ખેલાડીઓની વાસ્તવિક ઉપલબ્ધતાને ધ્યાનમાં રાખીને ટીમનું કોમ્બિનેશન નક્કી કરી શકાય.