1️⃣ અમદાવાદમાં આંતરરાષ્ટ્રીય ઠગાઈનો ભંડાફોડ
અમદાવાદ સાયબર ક્રાઇમ બ્રાન્ચે ચાંદખેડા વિસ્તારમાં ન્યૂ સીજી રોડ પર આવેલા સોંપાન હાઈટ્સના એક મકાનમાં દરોડો પાડી આંતરરાષ્ટ્રીય સ્તરે ચાલતું ફેક કોલ સેન્ટર ઝડપી પાડ્યું છે. આ કેસમાં કુશ પટેલ, હર્ષ પટેલ, આશુ પટેલ અને સુનિલ રાવત નામના ચાર આરોપીઓની ધરપકડ કરવામાં આવી છે, જેઓ કેનેડાના નાગરિકોને નિશાન બનાવી લાખોની છેતરપિંડી કરતા હતા.
2️⃣ ખોટા અધિકારી બની ઠગાઈ કરતા
મળતી માહિતી મુજબ આરોપીઓ કેનેડા રેવન્યુ એજન્સી અથવા બેન્કના અધિકારી હોવાનું નાટક કરીને વિદેશી નાગરિકોને ફોન કરતા હતા. તેઓ લોકોને તેમના બેન્ક એકાઉન્ટ જોખમમાં હોવાનું કહી ડરાવતા અને એકાઉન્ટ સુરક્ષિત કરવાના બહાને ગિફ્ટ કાર્ડ વાઉચર મારફતે પૈસા પડાવતા હતા.
3️⃣ તપાસમાં મળ્યો મોટો મુદ્દામાલ
પોલીસે દરોડા દરમિયાન આરોપીઓ પાસેથી ઠગાઈ માટે ઉપયોગમાં લેવાતી સ્ક્રિપ્ટ, 6 લેપટોપ, 5 મોબાઈલ ફોન અને હેડફોન સહિત કુલ ₹1.87 લાખનો મુદ્દામાલ જપ્ત કર્યો છે.
4️⃣ વધુ આરોપીની શોધ ચાલુ
પ્રાથમિક તપાસમાં સામે આવ્યું છે કે ઠગાઈથી મેળવેલી રકમ શિવાંગ નામના યુવકના ખાતામાં ટ્રાન્સફર થતી હતી, જે હાલ ફરાર છે. સાયબર ક્રાઇમે ચારેય આરોપીઓ સામે ગુનો નોંધી ફરાર આરોપીની શોધખોળ શરૂ કરી છે અને આ નેટવર્ક અન્ય ક્યાં સુધી ફેલાયેલું છે તેની પણ તપાસ ચાલી રહી છે.
