આણંદમાં આજે ફરી એકવાર વરસાદી માહોલ જામ્યો છે. દિવસ દરમિયાન વાતાવરણમાં અચાનક પલટો આવ્યો અને આકાશમાં કાળા વાદળો છવાયા બાદ શહેરમાં વરસાદ શરૂ થયો.
વરસાદ શરૂ થતાં જ આણંદ શહેરના રસ્તાઓ પર ચહલપહલ વચ્ચે વરસાદની અસર જોવા મળી, જ્યારે વાતાવરણમાં ઠંડક પ્રસરી જતાં લોકોને ગરમીમાંથી પણ રાહત મળી છે.
છેલ્લા કેટલાક દિવસથી ગરમી અને ઉકળાટનો અનુભવ કરી રહેલા આણંદવાસીઓ માટે આજનો વરસાદ રાહત લઈને આવ્યો છે. વરસાદના કારણે શહેરનું વાતાવરણ પણ એકદમ બદલાઈ ગયું છે.
જોકે વરસાદ વધે તો શહેરના નીચાણવાળા વિસ્તારોમાં પાણી ભરાવાની સાથે ટ્રાફિકની સમસ્યા સર્જાવાની શક્યતા પણ રહે છે. ત્યારે મહાનગરપાલિકાની ડ્રેનેજ અને પાણીના નિકાલની વ્યવસ્થા કેટલી અસરકારક રહે છે, તેના પર પણ નજર રહેશે.
બીજી તરફ વરસાદી માહોલને કારણે ખેડૂતોમાં પણ આશા જાગી છે. આગામી દિવસોમાં વરસાદનું જોર કેવું રહે છે અને આણંદમાં મેઘરાજા વધુ મહેર કરે છે કે નહીં, તેના પર સૌની નજર રહેશે.
હાલ તો આણંદમાં વરસાદના કારણે વાતાવરણ ખુશનુમા બન્યું છે અને શહેર ફરી એકવાર ચોમાસાના રંગમાં રંગાયું છે.