આણંદ: જિલ્લામાં આગામી સ્થાનિક સ્વરાજ્યની અને ઉમરેઠ વિધાનસભાની પેટાચૂંટણીને ધ્યાનમાં રાખીને પોલીસ હરકતમાં આવી છે. અમદાવાદ વિભાગના પોલીસ મહાનિરીક્ષક શ્રી રાઘવેન્દ્ર વત્સ અને આણંદ પોલીસ અધિક્ષક શ્રી જી.જી. જસાણીની સૂચના મુજબ પ્રોહિબિશન અને જુગારની પ્રવૃત્તિઓ ડામવા માટે સ્પેશિયલ ડ્રાઈવ ચલાવવામાં આવી રહી છે. જે અંતર્ગત આણંદ લોકલ ક્રાઈમ બ્રાન્ચે આંકલાવ પોલીસ સ્ટેશન વિસ્તારમાં દરોડો પાડી જુગારનો મોટો કેસ શોધી કાઢ્યો છે.
ચોક્કસ બાતમીના આધારે દરોડો
LCB પી.આઈ. શ્રી સી.પી. ચૌધરીના માર્ગદર્શન હેઠળ પોલીસની ટીમો પેટ્રોલિંગમાં હતી. આ દરમિયાન હેડ કોન્સ્ટેબલ બહાદુરભાઈ નવગણભાઈને ચોક્કસ બાતમી મળી હતી કે, આંકલાવના વીરકુવા ચોકડી પાસે નગરપાલિકાની પાણીની ટાંકી પાછળ આવેલી ખુલ્લી જગ્યામાં કેટલાક ઈસમો વરલી મટકાના આંકડાનો જુગાર રમી રહ્યા છે. બાતમીના આધારે LCB સ્ટાફે તાત્કાલિક દરોડો પાડતા જુગાર રમાડતા બે શખ્સો રંગેહાથ ઝડપાઈ ગયા હતા.
ઝડપાયેલા આરોપીઓ અને મુદ્દામાલ
પોલીસે સ્થળ પરથી બે આરોપીઓની ધરપકડ કરી છે, જેમાં (૧) કનુભાઈ શનાભાઈ પઢીયાર (રહે. અંબાવ, આંકલાવ) અને (૨) સલીમભાઈ ઈબ્રાહિમભાઈ ખલીફા (રહે. આંકલાવ) નો સમાવેશ થાય છે. પોલીસે આરોપીઓ પાસેથી સ્લીપ બુક, પેન, કાર્બન પેપર, આંકડા લખેલી ચિઠ્ઠીઓ અને કુલ રૂ. ૧૫,૪૫૦/- ની રોકડ રકમ સહિતનો મુદ્દામાલ જપ્ત કર્યો છે.
કાયદેસરની કાર્યવાહી
આ મામલે આંકલાવ પોલીસ સ્ટેશનમાં જુગાર ધારાની કલમ-૧૨(અ) મુજબ ગુનો દાખલ કરવામાં આવ્યો છે. આ સફળ કામગીરીમાં LCB પી.આઈ. સી.પી. ચૌધરી, પી.એસ.આઈ. આઈ.જે. રાણા તેમજ ASI જલમસિંહ, હેડ કોન્સ્ટેબલ રણવીરસિંહ, બહાદુરભાઈ અને પ્રમેશકુમાર સહિતની ટીમ જોડાઈ હતી. ચૂંટણી પહેલા આ પ્રકારની કડક કાર્યવાહીથી અસામાજિક તત્વોમાં ફફડાટ વ્યાપી ગયો છે.
