આણંદ જિલ્લામાં બપોરે બે વાગ્યે જ ગરમી 40 ડિગ્રીને પાર
આણંદ : આણંદ જિલ્લામાં બે-ત્રણ દિવસ ગરમીમાં મળેલી રાહત બાદ ફરી એક વખત કાળઝાળ ગરમી શરૂ થઈ છે. મંગળવારે બપોરે ગરમીનો પારો ૪૦ ડિગ્રીને પાર થઈ ગયો હતો. ત્યારે આગામી પખવાડિયા દરમિયાન પારો ૪૨થી ૪૫ ડિગ્રીની વચ્ચે રહેવાની સંભાવના હવામાન વિભાગે વ્યક્ત કરી છે.
આણંદ કૃષિ હવામાન વિભાગના અહેવાલ અનુસાર સોમવારે મહત્તમ તાપમાન ૪૦ અને લઘુત્તમ ૨૧.૬ ડિગ્રી રહ્યું હતું. જ્યારે ૧૧ ટકા ભેજ સાથે ૭.૫ પ્રતિ કલાકની ગતિએ પવન ફૂંકાયો હતો. જ્યારે મંગળવારે સવારે ૧૧ કલાકે તાપમાનનો પારો ૩૫ ડિગ્રીએ પહોંચ્યો હતો. ૧૧ કિ.મી.ની ઝડપે પવન ફૂંકાઈ રહ્યો હતો. બપોરે બે વાગ્યા સુધીમાં ગરમીનો પારો ૪૦ ડિગ્રીને પાર થઈ ગયો હતો. હવામાન વિભાગની આગાહી અનુસાર આગામી ૧૪ દિવસ સુધી કાળઝાળ ગરમી પડી શકે છે. ગરમીનો પારો ૪૨થી ૪૫ ડિગ્રી જવાની અને પવનની ગતિ ૧૮થી ૨૮ પ્રતિ કલાકની રહેવાની સંભાવના છે.