આંતરરાષ્ટ્રીય સુરક્ષિત ગર્ભપાત દિવસ નિમિત્તે વડોદરાના અલકાપુરી સ્થિત ડો. બી.આર. આંબેડકર હોલ ખાતે સહજ ફાઉન્ડેશન દ્વારા મહિલા આરોગ્ય અને સુરક્ષિત ગર્ભપાત અંગે જાગૃતિ કાર્યક્રમનું આયોજન કરવામાં આવ્યું હતું. કાર્યક્રમમાં સરદાર પટેલ યુનિવર્સિટીના સમાજ કાર્ય વિભાગના વિદ્યાર્થીઓએ સક્રિય ભાગ લીધો હતો.
કાર્યક્રમમાં જીએમઇઆરએસ મેડિકલ કોલેજ, ગોત્રીના સ્ત્રીરોગ અને પ્રસૂતિ વિભાગના વડા પ્રોફેસર ડો. આશિષ શાહ નિષ્ણાત વક્તા તરીકે ઉપસ્થિત રહ્યા હતા. તેમણે મહિલાઓના પ્રજનન સ્વાસ્થ્ય સાથે જોડાયેલા મહત્વના મુદ્દાઓ અંગે માહિતી આપી હતી.
સુરક્ષિત ગર્ભપાત અને કાયદાકીય જોગવાઈઓ અંગે માર્ગદર્શન
કાર્યક્રમ દરમિયાન 25થી 49 વર્ષની વયજૂથની મહિલાઓને સુરક્ષિત ગર્ભપાતની વિવિધ પ્રક્રિયાઓ અંગે સમજ આપવામાં આવી હતી. સાથે જ ગર્ભપાતને લઈને સમાજમાં જોવા મળતી ગેરમાન્યતાઓ અને તેના કારણે ઊભી થતી ગેરસમજ અંગે પણ ચર્ચા કરવામાં આવી હતી.
મહિલાઓને સુરક્ષિત ગર્ભપાત સંબંધિત કાયદાકીય જોગવાઈઓ અને તેમના અધિકારો અંગે પણ માહિતી આપવામાં આવી હતી. તબીબી નિષ્ણાત દ્વારા યોગ્ય તબીબી સલાહ અને સુરક્ષિત આરોગ્યસેવાઓના મહત્વ પર ભાર મૂકવામાં આવ્યો હતો.
સરદાર પટેલ યુનિવર્સિટીના સમાજ કાર્ય વિભાગના વિદ્યાર્થીઓએ પણ કાર્યક્રમમાં ભાગ લઈને મહિલા આરોગ્ય, જાગૃતિ અને કાયદાકીય અધિકારો અંગે સંદેશ લોકો સુધી પહોંચાડવામાં સહયોગ આપ્યો હતો.
કાર્યક્રમનો મુખ્ય ઉદ્દેશ મહિલાઓને સુરક્ષિત આરોગ્યસેવાઓ અંગે યોગ્ય માહિતી ઉપલબ્ધ કરાવવી અને ગેરમાન્યતાઓને દૂર કરીને જાગૃતિ વધારવાનો રહ્યો હતો.